Sentru fabrika ikan ne’e harii hosi Ministériu Turizmu Komérsiu no Indústria (MKIA) tempu Governu Aliansa Maioria Parlamentár (AMP) ho ekipamentu kompletu, maibé sasán sira ne’e la utiliza too agora.

Haree ba problema ne’e, Deputada  sira iha Parlamentu Nasionál (PN) aseita programa governu nian, maibé sira triste, tanba sasán estadu nian ne’e abandona no la utiliza.

“Hakarak atu dezenvolve buat ruma ita tenke halo planu no halo estudu ne’ebé kle’an ba planu ne’ebé hakarak atu implementa. Labele halo tiha mak foin halo estudu, ne’e mak realidade ohin loron hatudu ne’e, ita gasta osan povu saugati de’it la iha sustentabilidade,” dehan Deputada PN, Albina Marçal iha plenária PN, Tersa (07/02).

Deputada Albina sente triste, governu investe osan boot harii industria fabrika ikan la dezenvolve.  

Nia dehan, bainhira sira halo vizita ba fatin ne’e sira sente triste, tanba se karik indústria ne’e la’o, sei fó servisu ba peskadór lubuk ida iha Lautem.

Edifísiu sentru ne’e kuaze abandona tinan 10 ona, no parte MKIA too agora nunka tun vizita ba fatin ne’e.

Entretantu, INDEPENDENTE tenta halo konfirmasaun problema ne’e, ba Vice Ministru MKIA, Nino Pereira seidauk iha tempu atu fó komentáriu.