Ho problema Deputadu Parlamentu Nasionál, Fransico Bransco konsidera 'grave' no husu ba governu liu hosi Komisaun Direitu Labarik (KDL) atu haree problema labarik sira ne’ebé abandona eskola.
Branco dehan, labarik fa’an sasán agora akontese makas iha sidade Dili iha fatin hotu- hotu haree labarik lubuk.
“Ha’u triste bainhira haree labarik ki'ikoan sira leba sasán ba fa’an no sira la iha inisativu pera atu eskola ona, tanba ne’e governu presiza haree no tau matan tanba sira mak futuru nasaun ne’e nian,”dehan Francisco iha PN, horisehik.
Alende fa’an sasán, Deputadu ne’e mós observa labarik mane no feto lubuk ida halo atividade fase karreta no motór no hili kaleen aat ba fa’an.
Branco dehan, governu tenke halo lei ida para bandu labarik fa’an sasán, selae ema hotu- hotu sei la respeita direitu labarik sira nian liu –liu inan aman obriga oan fa’an sasán ho razaun sustenta ekonomia uma laran.
Iha fatn hanesan, Deputada, Angélica da Costa reforsa katak, realidade hatudu ohin loron labarik lubuk ida maka fa’an sasán hale'u sidade Dili.
“Iha parte baluk ha’u haree kontenta, labarik servisu la depende ba inan aman, maibé, ita tenki tau matan mós ba sira sira nia eskola,” tenik nia.
Deputada ne’e husu ba KDL atu halibur labarik sira ne’e hodi identifika sira nia problema.
Too notísia ne’e hatún, INDEPENDENTE tenta konfirma ba Komisária Direitu Labarik, Maria Barreto, maibé la hetan konfirmasaun.
