Ministru Planeamentu Investimentu Estratéjiku (MPIE), Xanana Gusmão rasik kontaktu ona Governu Japaun no Xina maka iha posibilidade atu fó apoiu fundus.

Iha mapa PEDN, Aeroportu Komoro Dili oras ne’e ho nia naruk metru 1850 no sei loke luan hakat liu Mota Komoro ho metru 3000.

Vice Ministru Obras Públiku Transporte no Komunikasaun (MOPTK), Inácio Moreira dehan, konstrusaun ba aeroportu Nicolau Lobato hein de’it osan. Tanba planu ne’e Ministru Xanana aprezenta ona ba Konsellu Ministru.

Governu mós sei muda lubuk ida ne’ebé hela iha parte norte Kampu Marinir Dili hakarak ka lakohi, simu ka lasimu, estadu sei prepara fatin ba sira hodi muda sai.             

Inácio hatete, konseitu ne’ebé governu propoin hahú uluk halo konstrusaun ba terminál, tanba iha parte sul ne’e mamuk too rohan, entaun terminál sei halo iha parte sul,bainhira terminál  halo hotu ho didi’ak haree terminál nia reprezentativu ne’e oinsá, segundu faze mak halo fali aviaun para fatin iha porte  weste, depois terminál komesa loke ou uza ona, terseira fase mak halo estensaun ba iha pista.

Prosesu tékniku kona- ba dezeñu no BoQ  governu prepara ona hein de'it orsamentu atu implementa.

Iha parte seluk, Luta Hamutuk Diretor Ezekutivu Luta Hamutuk (LH) Mericio Akara  governu presiza uza didi’ak osan ne’e hodi halo Aeroportu ho kualidade.

Tuir nia hanoin sira ne’e di’ak, tanba Aeroportu Nicolau Lobato ne’e sai hanesan odamatan primeiru ba Timor. Tanba ne’e Aeroportu ne’e tenke hadi’a tuir kondisaun Aeroportu internasionál nian.