Prezidente Komisaun D, Deputada, Jacinta Pereira  konsidera atividade Ekipa Jestaun Merkadoria Hijine Orden Públiku (GMHOP) no polisia halo operasaun hadau povu nia sasán hanesan violasaun kontra direitu negosiante sira nian atu buka moris.

“Parlamentu Nasionál lamentavel tebes ho atua saun pesoál guarda munisípiu Dili nian ba atuasaun ba vendadores sira leba hela sira nia sasán husi Aileu tun ba Dili sira halo operasaun  foti hotu ema nia sasán tau hotu karreta leten,”  dehan Jacinta iha PN, horisehik.

Jacinta lamenta, pior liu mak sama estraga negosiante sira sasán no ameasa too baku rahun sasán no karrosa sira foti lori ba soe.

Nia dehan, PN rasik simu ona ona keixa no lamenta saun hosi negosiante kiik sira ba tanis iha PN relasiona ho atuasaun brutál.

Ho  problema ne’e, Jacinta apela ba Prezidente Munisípiu Dili, Gaspar Soares atu halo sosializasaun makas ba dekretu lei governu nian uluk, la’ós ba hadau fali ema nia sasán maka uluk.

Nia hatutan, bainhira GMHOP halo sosializasaun ba komunidade sira para oinsá komunidade sira bele komprende atu nune’e labele halo atividade negósiu iha sidade laran.

“Ita presiza kontinua halo sosializasaun ba  vendaores sira tanba sira ne’ebé iha Dili ne’e sira komprende, maibé sira ne’ebé husi Likisá, Aileu sira seidauk hatene tanba ne’e órgaun kompetente presiza halo sosializasaun ba komunidade sira atu oinsá sira bele komprende ” Jacinta  sujere.

Entretantu Prezidente Autoridade  Munisípiu Dili, Gaspar Soares dehan, iha tempu badak sira nia parte sei koordena ho Prezidente Administradór Likisá ho Aileu para bele halo sosializa dekretu lei 33/ 2008 ba komunidade no negosiante sira.

Atu garantia sidade Dili ne’ebé sai hanesan kapitál nasaun Timor- Leste, Gaspar Soares husu ba povu hotu tenke iha konsisténsia atu kupri lei no orden ne’ebé mak ezekuta ona.