Tuir dadus husi Fundo  Desenvolvimeto Capital Humanu (FDCH)  bolseiru Timoroan hamutuk ema na’ín 3.400.

Husi numeru nee konta  hahu husi tinan 2011, sira ne’ebé gradua fila ona mai Timor maibé balun oras nee seidauk hetan servisu, nunee iha tempu badak Ministeriu sei koloka tuir idaidak nia area.

Ministra Interina  Dulce de Jesus Soares hatete, boseiru sira ne’ebé husi Asia hanesan Tailandia no Indonezia, balun husi  Brazil sira hamutuk ema na’in 200 resin.

Relasiona ho bolseiru hirak ne’e maka ME organiza enkontru ida hodi bolu bolseiru sira atu hateten simu fali ona sira no mos atu halo atualizasaun dadus hodi hatene loloos sira nia prezensa loloos agora hela iha ne’ebé.

“Ita iha persentajen bot tebes ba orsamentu ne’ebe ita tau husi FDCH no ita hetan rezultadu ne’ebe diak,”dehan  Dulce ba Jornalista sira iha Salaun MSS depois de  hala’o enkontru ho bolseiru sira horisehik.

ME halo daudaun  servisu atu oinsa foo servisu ba sira maibe sira tenki halao estaziu ba instituisaun sira ne’ebe mak presiza  tuir backgraund  edukasaun idaidak nian.

“ME nia totalidade too agora iha ema na’in 950 ne’ebe gradua ona hahu husi 2011   balun la marka prezensa tanba servisu hela iha munsipiu,”tenik nia.

Iha fatin hanesan Sekretariu Ezekutivu FDCH Ismenio Martins da Silva hatete, bolseiru sira hamutuk  3.400 husi tinan 2011 ida ne’e signifika tinan-tinan orsamentu FDCH nia metade ba iha bolsu estudu tokon 180 ba programa tomak no iha tokon 60 mak gasta ona ba iha bolsu estudu ate agora.

 Nia dehan, iha Portugal propinas baratu maibe vida maka karun, ba nasaun Kuba kada Medisina ida maka atu remata nia tenke hatama osan hamutuk dolar rihun 120.

Programa tenke kontinua hotu hotu konkoorda tantu husi partidu ne’ebe deit tenki tau nafatin prioridade ba Rekusru humanu.

Planu ba tinan ne’e ME haruka tan ema na’in  45 ba tan nasaun CPLP  no FDCH mos sei haruka tan 50 ba Indonezia iha area enjineria no Veterinaria.