Kada tinan, Ministériu Edukasaun halo kontratu ho Jornál emprime nasionál hodi públika lista estudante ne’ebé pasa iha UNTL.

Kriteria ida atu halo rejistu fila fali mak kada estudante ne’ebé pasa tenke lori jornál ne’ebé públika sai ninia naran.

Problema mosu tanba, jornál ne’ebé públika estudante sira nia naran la konsege kontrola prosesu faan jornál, nune’e ema balun faan jornál ho folin ne’ebé aas.

Deputadu Bankada FRETILIN, Eladio Faculto konsidera kontratu ne’ebé ME halo ne’e hanesan explorasaun ida ba estudante sira.

“Jornal ida dollar $5. Ita-nia povu nia oan sira mai husi foho, (tenke) sosa jornál ida dollar $5, depois lakon tan,” dehan Eladio ba jornalista sira iha Parlamentu Nasional (PN), Segunda (23/01). 

Tuir nia, di’ak liu estudante sira nia naran ne’ebé pasa iha teste taka de’it iha kuadru avizu UNTL nian.

Bainhira hakarak halo kontratu, nia dehan, jornál sira presiza halo kontrolu maka’as atu nune’e ema labele faan ho folin ne’ebé karun demais.