Ida ne’e mak akontese ba Diamon Mendonça ne’ebé sofre violensia husi Luis da Conceicão tanba de’it liafuan ‘Panleru’.

Tuir deklarasaun husi arguidu Luis katak nia baku lezadu Diamon tanba bainhira nia lori paun ba faan iha Merkadu Taibessi, lezadu haruk lezadu nia oan hodi bolu arguidu ‘panleru’.

“Tuir loloos ne’e ha’u la baku lezadu, (maibé) tanba iha momentu ne’e ha’u lori paun ba merkadu lezadu dehan ba nia oan bolu ha’u panleru, tanba ne’e mak ha’u nervozu hodi baku nia, tanba ha’u la simu,” dehan arguidu ba Tribunál.

Tuir kronolojia ne’ebé Ministériu Públiku lee sai iha audensia julgamentu Segunda (23/01) katak, iha 22 Fevereiru 2016 tuku 9:30 dader iha Merkadu Taibesi, arguidu tuku dala ida iha lezadu nia inus, dala ida iha kanuruk no tebe dala ida iha kabun.

Liu tiha loron ida, iha loron 23 fulan ho tinan hanesan, arguidu kontinua ba lezadu nia uma hodi tebe tan lezadu nia kabun to’o monu ba rai. 

Iha fatin hanesan, lezadu informa ba Tribunál katak, nia laiha intensaun atu bolu arguidu ‘panleru’.

“Ha’u bolu ha’u-nia oan sira maibé sira la mai tanba ne’e mak ha’u dehan  ‘imi-nia Apa mak Luis panleiru ne’e ka?’,” deklara nia.

Razaun seluk, lezadu dehan, nia nervozu tanba nia deskonfia arguidu gosta lezadu nia kaben no hakarak atu hola.

“Antes problema ne’e akontese arguidu gosta fali ha’u-nia fen no hakarak hola fali ha’u-nia kaben,” hatete lezadu.

Entretantu, Ministériu Públiku husu ba Tribunál atu fó pena prizaun tinan ida suspende ba tinan rua no Advogadu husu ba Tribunál atu fó pena ne’ebé adekuadu tanba arguidu arepende ba nia sala no sei la halo tan.

Audunsia julgamentu ne’e prezide husi Juiza Albertina Neves. Ministériu Públiku reprezenta husi Prokuradór Napolião da Silva no arguidu hetan asistensia legal husi Advogadu Privadu Rui Antonio Mendoça.