Mane ida ho inisial AC karik iha hanoin di’ak hakarak atu hasai imajen husi feto ida ho inisial IG ho telefone ne’ebé nia kaer. Maibé, bainhira IG hatene AC hasai hela nia foto, IG hatudu reasaun la gosta.
Hahú husi ne’e mosu diskusaun entre AC ho IG. Feto husu ba AC atu hamoos foto ne’ebé nia hasai husi telemovel, maibé AC lakohi.
Diskusaun entre feto ho mane ne’e sai manas liu tan no ikus mai AC hahú nervozu no tuda fatuk ba IG nia hirus-matan.
Tuir akuzasaun husi Ministériu Públiku (MP), iha 17 Abril 2017 iha Mascarinhas, lezada IG diskuti-malu ho arguidu AC ne’ebé hasai IG nia foto sein husu lisensa.
“Arguidu nervozu hodi foti fatuk tuda ba lezada nia hirus-matan. Lezada salva an hodi halai tama ema-nia uma maibé arguidu kontinua kaer fatuk, duni tuir lezada, tuda tan kona lezada nia liman karuk,” deklara MP iha sala audensia julgamentu Tribunal Munisipiu Dili, Kinta (21/02).
Ho hahalok ne’e MP akuza arguidu hanesan ko-autór material ho forma konsumadu ba pratika krime violensia domestika ho ameasa pena prizaun tinan 3 ka multa.
Ba akuzasaun ne’e arguidu dehan nia la tuda lezada maibé soe fatuk mak kona lezada nia hirus-matan.
Enkuantu, lezada afirma akuzasaun husi MP no hatete katak arguidu tuda duni nia.
“Nia tuda duni ha’u kona iha ha’u-nia hirus-matan to’o bubu, tanba ha’u hirus nia hasai ha’u-nia foto subar de’it,” dehan lezada.
Entretantu, liu husi alegasaun final MP husu tribunál aplika pena prizaun fulan 6 suspende ba tinan ida, inkui selu indinimizasaun $20 ba lezada.
Parte defeza husu atu absolve indinimizasaun $20 no husu atu aplika pena ne’ebé justu no adekuadu ba arguidu.
Tribunál adia julgamentu ba 8 Marsu 2019 tuku 17:00 hodi rona desizaun final.
