Nia esplika, kazu ne’e agora iha ona tribunál la signifika sala ona, tanba buat ida asas praduka tak bersalah ne’e importante tebe-tebes.
“Kazu ne’e la’ós difamasaun, kazu difamasaun la hanesan, ita nia lei la kriminaliza difamasaun, ita nia Lei la premiti mak denunsia kalonioza ka dun matak. Ema ida kuandu públika informasaun ida dun matak ema seluk, ida ne’e mak la di’ak,” dehan nia, iha Palasiu Governu Tersa (3/1).
Nia hateten, laiha informasaun kona-ba kazu ne’e, tanba nia mós akompaña liu husi média de’it. Ne’e duni, advogadu ho juis sira konkorda ona atu haruka pergunta ba nia hanesan lezadu, mais to’o agora seidauk simu pergunta, ne’ebé hein de’it, se karik iha informasaun ruma prontu nafatin atu kolabora ho justisa.
Entretantu, Rui informa, denunsia kalonioza bolu dehan krime públiku. Signifika hanesan lezadu bele aprezenta keixa ka lae, autoridade justisa iha obrigasaun atu tesi lia ne'e.
Nia afirma, problema ne’e aprezenta ona ba ministériu públiku. Ne’e duni deside atu lori ba tribunál ka lae. Maibé infelizmente lei la premite iha kazu krime públiku ema lezadu labele atu intervein.
“Tanba ne’e mak husik ba tribunál mak halo julgamentu, depois mak ita haree, sé mak sala, sé mak loos,” hateten Rui.
Aleinde ne’e, nia reforsa, preokupasaun ba nivel nasionál iha tendénsia halo julgamentu ba ema molok tribunál foti desizaun. Maibé jornalista sira haree kazu governante lubuk ida ne’ebé ba justisa, molok desizaun sai husi tribunál públiku julga tiha ona dehan ema ne’e sala, ne’e la loos.
“Ita nia sosiedade ida ho baze direitu ne’e labele funsiona hanesan ne’e, iha ne’e ha’u husu deskulpa barak, ha’u hakarak hateten ida ne’e ba ita boot sira, mais papél média ne’e importante tebe-tebes, tanba se ita hare didi’ak ema barak iha governu asume funsaun públika ida, kuandu kazu ba ona iha tribunál ema hanoin ne’e sala tiha ona, nia label ne’e korruptor ba laloos, orasida dehan na'ok-teen ba laloos, mais buat ne’e seidauk komprovadu iha tribunál, ita nia sosiedade labele funsiona hanesan ne’e, se ita funsiona hanesan ne’e ita susar hotu ona,” tenik nia.
Nia salienta, nu'udar sidadaun ou governu hakarak apela ba ita bo’ot sira katak, kuandu halo reportajen ba kestaun hanesan ne’e kuidadu ho termu sira ne’ebé utiliza para labele halo julgamentu antes tribunál foti desizaun.
Nia dehan, kazu resente liu mak Eis Ministra Finansas (MF), Emília Pires ho eis Vise Ministra Saúde (MS), Madalena Hanjam. Maibé molok tribunál seidauk hasai desizaun mós ema hotu-hotu dehan sira sala tiha ona, ne’e laloos.
“Se ita boot sira imajina, se ha’u halo kampaña ida para hateten ita boot sira nia kolega ne’e sala tiha ona, mezmu molok tribunál atu deside, ne’e ita boot sira nia sentimentu halo oinsá, ne’e mak ha’u nia hanoin iha sosiedade ita nian ne’e, ita presiza hato’o kestaun sira ne’e, tanba hanoin ne’e laloos,” esplika nia.
Nia dehan, se mak halo sala tenke asume responsabilidade. Ne’e duni se iha provas katak nia komete duni krime tenke asume ninia responsabilidade. Maibé antes órgaun kompetente hasai desizaun ema ne’e loos ou sala, menjatukan vonis tiha ona tau ona label ba ema sente la justu.
