Ministru Defeza, Cirilo Cristóvão dehan, diretiva sai ona tinan 2017 autoridade seguransa ho defeza sei la fó fatin ba kriminozu sira atu hela nafatin iha Dili.

“Ita haree ikus-ikus ne’e ema la'o kalan mós ta'uk ba rama ambon, maibé diretiva sai ona iha tinan oin ita nia atuasaun duru liu no la fó fatin ba kriminozu sira atu hela iha Dili,” dehan Cirilo, foin lalais ne'e. 

Nia hatutan, ba Maromak sei iha perdaun maibé militár ho polisia nia atuasaun ba kriminozu la iha perdaun, tanba governu hakarak tinan oin ne’e ema hotu moris iha pás no estabilidade nia laran.

“Diretiva polítika sai ona ba operasaun nian ne'ebé maka duru hasoru kriminozu sira no tinan oin ita la kohi rona tan rama ambon iha Dili,” dehan Cirílo.

Nia hatutan, hotu-hotu tenke koopera ho F-FDTL ho PNTL nune’e bele haforsa liu tan paz no estabilidade iha nasaun ida ne’e tanba povu hakarak moris iha hakmatek nia laran. 

Militár Lanu Halo Problema Hasai

Militár sira husi Instituisaun Falintil Forsa Defeza Timor Leste (F-FDTL) nian ne’ebé lanu iha loron boot hodi halo problema di’ak liu hasai.

Ministru Defeza Cirilo Cristóvão dehan, militár sira hemu lanu halo problema iha povu nia leet nia husu ba Estadu Maiór haree di’ak liu hasai tiha de’it ema hanesan ne’e la serve iha instituisaun.

“Ikus-ikus ne’e ha’u rona forsa sira lanu halo problema, tanba ne’e ha’u husu Estadu Maiór haree di’ak liu hasai tiha de’it ema sira hanesan ne’e.” Tenik Cirilo 

Nia hatutan, Natál de’it fatin balun iha Dili laran sira hemu lanu depois halo problema, tanba ne’e nia nu'udar Ministru la kohi rona tan ida ne’e atu akontese.

Tanba ne’e governante ne’e husu no lakohi rona tan ida ne’e. alende ne’e parte nia mós husu ona Xefe Estadu Maiór Jenerál ho instituisaun toma dixiplina duru se  la ho dixiplina sai.

Nia hatutan, nasaun ne’e presiza ema ho dixiplina mak tama forsa, banati tuir veteranu sira nia ain fatin, nia rona zero 11 sira ida foun sira ne’e mak la di’ak loos, estadu depozita konfiansa ba militár sira ne’e la'ós atu hemu lanu halo problema.

Tanba ne’e nia husu ba povu tomak atu hato’o keixa karik hare membru F-FDTL sira ne’e lanu halo problema nune’e bele foti medida hasoru sira.