Presidente  CVTL-TL  José Pereira da Concecão  hatete, iha tinan kotuk CVTL fo tiha ona voluntáriu na’in 4 iha nivel profisionál, iha  koñesimentu primeiru sokorru ba ambulánsia hodi tulun ema, evakua ema moras sira ou  kanek  ne’ebé hetan dezastre.

 “Kooperasaun  iha tinan uluk, haree katak atividade hirak ne’e iha benefísiu diak. CVTL fó duni kontribuisaun di'ak. Entaun DFAT-Austrália hanoin katak kontinua nafatin ho ida ne’e ou aumenta tan. Ne’e mak ami assina tan memorandum,”dehan  Presidente  CVTL  José Pereira da Conceição ba Jornalista sira Sesta foin lalais ne’e iha nia knaar fatin Bairru Grilos-Dili.

 Husi asina akordu ne’e atu entrega tan voluntáriu nain 8 ba servisu iha Dirasaun Nasionál Ambulânsia.

Orsamentu ne’e apoiu husi DFAT-Australia ho montante  U$ 25. 550 ba tinan ida.

CVTL  mak jere voluntáriu na’in 12 ne’e nia vensimentu, maibé  sira servisu destaka ba iha ambulánsia, atu fó apoiu ambulánsia nasionál hanesan kna’ar CVTL ninia mandatu.

Iha lei re koñesimentu CVTL katak, CVTL hanesan ausiliár ba autoridade públiku.

Kooperasaun ida ne’e  to’o fin de Dezembru 2017, maibé  CVTL kontinua esforsu hatudu prestasaun servisu di’ak atu nune’e doadór sira kontinua fo apoiu para atinje metas ne’ebé dehan ema hotu hetan asesu  ba iha saúde.

Voluntáriu ne’ebé CVTL entrega ba MS mesak nível a’as liu-liu abillidade iha primeiru sokoru, sira halo kna’ar kontratadu husi CVTL nia okos.

Iha fatin hanesan  Diretór Nasioná0l ba Servisu Apoiu Hospitalária Emerjênsia Horacio Sarmento da Costa hatete, akordu ida ne’e ba dala 2, primeiru akordu iha tinan 2006 mak voluntáriu na’in 4 mak ba servisu iha ambulânsia nian hodi fo apoiu, Segundo akordu aumenta tan ema na’in 8  hamutuk na’in 12.

Husi na’in 12 ne’e servisu apoiu ambulânsia, servisu rotasaun depois iha eventu ruma sira mós iha ekipa hotu para fó atendimentu ba  komunidade sira.