Sexta, 28 Fevereiru 2020 | Login
Roman Lilin Roman Lilin

Roman Lilin Fahe-malu iha Portu Dili Featured

NAKUKUN dolar neneik hodi dudu sees roman loro-matan nian. Oin muron ida hamrik iha estrada-ibun, nia liman kumu hela lilin no aifunan. La interese ho movimentu viaturas. Nia loke matan ne’ebé iha menutu balun taka, sunu lilin no kari aifunan.

Loron ne’e, 19 Maiu, Timor-Leste hakfodak. Nia lider ida ne’ebé durante tinan barak nia laran ho komitementu boot servi nia rai no povu, fila hikas ba Aman Maromak nia kadunan.

Karreta Mini Pajero kór mean ho xapa matríkula 21-215 ne’ebé mai husi dirasaun Praia dos Coceiros teki-teki halai sees husi estrada no xoke moru portu Dili. Eng. Mario Viegas Carrascalão mak kondus karreta ne’e.

Sofre kurasaun aumenta ho asidente trafegu ne’e halo doutór sira iha Ospital Nasionál Guido Valadares ‘hiit liman’ bainhira eis governadór Timor Timur nia isin to’o iha sala emerjensia.

Iha kalan ne’e, bainhira movimentu iha kapital Dili hahú menus, isin ida hakbesik an ba fatin karreta ho kondisaun roda sa’e iha estrada-ibun portu Dili. Nia taka matan, hakruk iha menutu balun hodi hasa’e orasaun, hafoin tuur no sunu lilin ne’ebé nia lori.

Lilin fahe-malu nian ho aifunan ne’ebé nia kari sai hanesan simblu onra ne’ebé nia fó ba ema ne’ebé durante nia moris ajuda Timor-oan lubuk ida hodi sai matenek.

Adeus Carrascalão. Obrigadu ba ita-boot nia sakrifisiu, kontribuisaun no dedikasaun ba rai no povu Timor-Leste. Deskansa ho pás iha Maromak nia mahan, ho domin Ó deskansa iha ami fuan.

Karreta sei Para iha Estrada-ibun

Tuir observasaun jornalista Jornál INDEPENDENTE, hafoin loron (3) asidente ne’ebé ‘hamate’ Eng. Carrascalão, karreta Pajero ho xapa matrikula 21.215 kontinua habai an iha loron laran.

Komunidade ida, Joanico Gama hato’o ninia preokupasaun tanba to’o serimonia funeral, maibé karreta saudozu Eng. Carrascalão seidauk hasai.

PNTL sei Halo Ezaminasaun ba Asidente

Komadante Daruak PNTL Munisipiu Dili, Superintendente Asistente Euclides Belo informa, Komando PNTL Dili sei loke prosesu ezaminasaun ba asidente ne’e hodi kabe ba rezultadu mediku.

Nia dehan, parte investigasaun no tranzitu PNTL Dili sei halo ezamisaun iha terenu hodi bele hatene loloos motivu husi asidente ne’e.

Biografia Badak Saudozu Eng. Carrascalão

Carrascalão Moris iha Waitalipu-Venilale, Munisípiu Baukau, 12 Maiu 1937. Saudozu nudar oan dalimak husi maun-alin na’in 12, oan husi Manuel Viegas Carrascalão (sidadaun portages) no Marcelina Guterres (sidadania Timor).

Iha Okupasaun Indonézia Mário Carrascalão hetan fiar husi Governu Indonézia sai Governadór Timor Timur. Saudozu assume kargu ne’e iha loron 18 Setembru 1983 to’o 18 Setembru 1992. Durante kaer knaar nu’udar Governadór lider kurazozu ne’e sempre defende povu nasaun ne’e nia dignidade hodi luta hasoru injustisa husi forsa militár Indonézia.

Polítika no estratéjia ne’ebé Carrascalão trasa iha tempu ne'ebá mak prepara rekursu umanu liu husi fó bolsu estudu ba Timoro-an hodi ba eskola iha Indonézia.

Iha tinan 1993, Mário Carrascalão hetan fiar hodi sai Embaixadór Indonézia nian iha Romania.

Iha tinan 1998, bainhira CNRT hala'o reuniaun iha penisiu Portugál, fó fiar ba Carrascalão nudar Vise Prezidente CNRT.

Iha loron ikus, molok nia is kotu, Kinta 18 Maiu 2017, saudozu simu kondekorasaun husi Eis Prezidente Repúblika, Taur Matan Ruak, nudar rekoñesimentu ba ninia kontribuisaun iha tempu rezisténsia to’o ohin loron.

Read 970 times
Rate this item
(1 Vote)

About Author

MidAd1