Tersa, 10 Dezembru 2019 | Login
Sekretaria Estadu Formasaun Profesional no Empregu Sekretaria Estadu Formasaun Profesional no Empregu

SEFOPE Promesa Hasa’e Saláriu Minimu ba Trabaladores Featured

DILI:Sekretariu Estadu Formasaun Profesional no Empregu (SEFOPE) kompromete iha tempu badak nia laran sei hasa’e salariu minimu ba trabaladór sira iha TL.

Sekretariu Estadu Julião da Silva hatete, governu iha ona politika atu hasa’e salariu minimu.

Maske la fó detallu salariu minimu sei sai ba hira, maibé nia dehan, proposta husi SEFOPE ba salariu minimu ne’e hato’o ona ba Konsellu Ministru hodi hein aprovasaun.

“Ha’u hanoin ita atinje ona porsentu 95 depois Konsellu Ministru aprova ona mak foin ita hahú politika ida ne’e” dehan nia hafoin remata seminariu loron trabaladór iha Delta Nova, Tersa (30/04).

Iha fatin hanesan, Prezidente CCI-TL Oscar Lima hatete, iha tinan 2016 iha akordu ida atu hasa’e salariu minimu husi $115 ba $150.

Maibé, nia dehan, governu presiza kapasita trabaladór sira sai professional, tanba bainhira trabalador sira serbisu professional kompaña sei hasa’e ninia salariu.

“Ha’u hanoin ami emprezariu laos salariu minimu tanba uluk ami diskuti ona maibé ami mós husu ba governu par prepara trabaladór sira sai professional.”

“Tanba trabaladór sira iha kompaña balun hetan ona $200 ba leten, nune’e tenke serbisu nafatin atu bele aumenta tan salariu,” dehan nia.

Iha fatin hanesan, Prezidente Konfederasaun Sindikatu Timor Leste (KSTL) Ramelo da Costa hatete, nia parte sei koopera ho governu hodi hasa’e salariu minimu.

Tanba, tuir observasaun husi KSTL, trabaladór sira barak mak sai vitima ba salariu minimu ne’ebé ladun adekuadu iha situasaun ekonomia rai laran.

“Ami deteta iha setor privadu no mós governu ita-nia trabalador sira iha skill mais fó nafatin salariu minimu,” dehan nia.

Enterantu, Sindikatu Jerál Traballadór Timor Leste (SJT-TL), iha loron mundiál traballadór nian hamutuk ho sindikatu sira seluk hala’o karava haleu Dili hodi husu ba governu atu hahú halo ona revizaun ba salariu minimu husi $115 ba $200.

Sekretáriu Jerál SJT-TL, Almerio Villa Nova hatete, iha komemorasaun loron trabaladór iha tinan ne’e pontu importante ne’ebé koloka mak ejize ba empregadór sira atu kria fatin serbisu ne’ebé dignu, hasa’e salariu, respeitu no trata traballadór sira hanesan umanu, no labele hanoin sira hanesan atan.

“Pontu importante ne’ebé ami koloka iha komemorasaun ne’e husu atu hasa’e salariu traballdór sira nian husi $115 ba $200 tanba salariu bazika atual ne’e la nesesariu ona ho situasaun ekonomia iha rai laran,” dehan nia.

Tuir nia, loloos revizaun ba salariu minimu ne’e akontese kada tinan rua.

“Molok ne’e salariu minimu $85, hafoin halo revizaun ba $115, tuir loloos lei ne’e kada tinan rua tenke halo revizaun, maibé ikus-ikus ne’e tama ona ba tinan neen (6) maibé ne’e la akontese,” katak nia.

Nia dehan, SJT-TL halo ona peskiza no hato’o ona sira-nia sujetaun ba SEFOPE atu konsidera.

Foin lalais Konsellu Nasionál Traballu ne’ebé kompostu husi SEFOPE, CCI-TL no Sindikatu Traballdór hala’o enkontru no deside ona salariu minimu hodi lori ba Konsellu Ministru atu aprova.

“Salariu minimu ne’ebé Konsellu Nasionál Traballu sira deside atu hasa’e to’o hira ha’u seidauk hatene maibé ami-nia mehi liu husi ejizensia ne’e iha salariu bazika nasionál $200,” dehan nia.

Maske SJT-TL hakarak salariu minimu sa’e to’o $200, maibé sei konsidera mós proposta husi empregadór sira.

“Maibé atu hasa’e to’o de’it $150 ka $160 ne’e depende ba mós empregadór sira-nia proposta, hafoin bele diskute hodi halo konkordansia ida, hafoin bele deside,” dehan nia.

Read 562 times
Rate this item
(0 votes)
MidAd1