Tuir informasaun ne’ebé diáriu ne’e rekolla husi ema sira ne’ebé besik autor ne’e katak, kleur ona nia la hela ona Bebonuk. La hatene klaru agora daudaun ninia rezidénsia loloos iha ne’ebé.

“Besik tinan ida ona nia la hela iha ninia uma Bebonuk ne’e”, tenik fonte ne’ebé lakohi fó sai ninia identidade ne’e.

Nune’e, informasaun seluk ne’ebé hetan fonte besik arguidu katak, dezde akontesimentu kazu ne’e arguidu mós muda ona ninia rezidénsia ba Bairru-Pité ho ninia oan-feto.

“Depois kazu ne’e mosu nia sees-aan husi ninia uma,”dehan nia, iha Bebonuk, horisehik.

Nia esplika, arguidu ninia rezidénsia iha Bebonuk ne’e ninia kaben no oan sira maka hela, maibé nia rasik nunka ba fatin ne’e.

Nune’e, diáriu ne’e mós tenta atu identifika hela fatin arguidu nian iha Bairru-Pité maibé la konsege hela.

Entretantu, Advogadu arguidu AAP, Januário Martins hateten, bainhira polisia identifika, autór ne’e deklara katak nia hela fatin loloos maka iha Bebonuk.

Defeza arguidu ne’e hatutan, imposivel ba autór ne’e halai sees husi justisa tanba agora daudaun arguidu nia-pasaporte ne’ebé uza ba estranjeiru Tribunál prende hotu.

Tanba ne’e, advogadu arguidu AAP deklara, ninia kliente agora daudaun iha Timor hodi hein prosesu investigasaun ne’ebé tuir mai.

“Ami nia kliente Tribunál aplika medida koasaun TIR ho proibisaun ba auzénsia atu nune’e arguidu labele halai sees husi justisa no hatene nia hela fatin,” dehan nia.

Januário hatutan, agora Tribunál aplika medida TIR atu nia hela nafatin ne’ebé arguidu fó ba Tribunál no mós polisia, tanba ne’e dehan informasaun arguidu halai sai la loos.

Entretantu, Polisia Nasionál Timor-Leste (PNTL) mós dismente informasaun ne’e, maibé la esplika klaramente paradeiru arguidu ne’e.

“Informasaun autór droga AAP dehan halai ne’e informasaun ne’ebé la loos,” dehan Segundu Komandante Jerál PNTL, Komisáriu Mateus Fernandes.

Antes ne’e, PNTL hamutuk ho Servisu Alfándega sita pakote ai-moruk ne’ebé deskonfia materiál primária ba produsaun droga ho naha kilograma 250.

Ai-moruk ho tipu Carisprodol (Physicotropic) kontein ho elementu metamfetamine "Crystal Meth" ka "shabu-shabu kristál" ne'ebé prontu ona atu uza hanesan Narcotics.

Ai-moruk tipu Carisprodol (Physicotropic) bele hatama bainhira iha autorizasaun husi Ministériu Saúde, tanba uzu ai-moruk ne’e la kontrola husi doutór bele fó efeitu negativu ba saúde hanesan neon lakon no bele rezulta ema mate, hanesan iha Indonézia, tinan kotuk.

Iha Tinan kotuk, iha Kendiri-Sulawesi, Indonézia, ema na’in rua mate no na’in 50 tama ospitál tan konsumu ai-moruk ho tipu hanesan.