Aprezenta Tratadu FM, Governu Hein Desizaun Xanana Featured

By Artur da Luz Outubru 22, 2018 2527
Ministru Reforma Lejizlativa Asuntu Parlamentár (MRLAP), Fidelis Magalhães Ministru Reforma Lejizlativa Asuntu Parlamentár (MRLAP), Fidelis Magalhães

DILI: Governu seidauk bele aprezenta dokumentu tratadu Fronteira Marítima ne’ebé Austrália ho Timor-Leste asina ona iha inisiu tinan ne’e, atu hetan ratifikasaun iha Parlamentu Nasionál.

Governu sei hein Xefe Negosiadór Prinsipál ba Delimitasaun Fronteira Marítima, Kay Rala Xanana Gusmão, bainhira fila husi rai li’ur.

Ministru Reforma Lejizlativa Asuntu Parlamentár (MRLAP), Fidelis Magalhães hateten, Governu sei hein Xanana fila husi estranjeiru mak ajenda no lori tratadu FM ba Parlamentu Nasionál.

“Ita sei hein konfirmasaun husi reprezentante espesiál Kay Rala Xanana Gusmão, nune’e tempu badak governu sei lori ba PN hodi finaliza”, dehan Fidelis, iha edifísiu CNE, Kolmera, horisehik.

Nune’e, nia dehan, oras ne’e Governu sei preokupa ho pose ba membru kandidatu membru Governu na'in sia ne’ebé pendente, nune’e iha inisiu Novembru tinan ne’e atu diskute tan OJE 2019.

Maski nune’e, iha tempu badak sei koordena ho Parlamentu Nasionál ratifika lalais tratadu Fronteira Maríima entre Timor Leste ho Austrália ne’ebé iha ona akordu.

Rate this item
(0 votes)

Independente Digital TV