Juventude husi organizasaun ne’e la konkorda atu Parlamentu Nasionál sosa tan viatura foun tanba karreta Prado tuan sira ne’e sei iha kondisaun atu bele utiliza hodi halo servisu.

Membru MUTL, Elianus da Costa Oliveira hateten, Prezidente PN anteriór deklara ona sei halo despaxu ba Polisia Nasionál Timor Leste (PNTL) atu ba foti fali karreta sira ne'ebé eis-deputadu sira uza, hodi fasilita atuál deputadu sira ninia servisu, maibé to’o oras ne’e laiha kontinuasaun.

Nia dehan, karreta ida mak $41.000, tanbasá la halo dezenvolvimentu ba nesesidade báziku povu nian, tanba preokupasaun povu nian maka laiha asesu ba estrada no bee moos.

“Nusa la aloka osan ne’e halo estrada, nune’e povu sira uza hodi asesu ba fa'an produtu lokál iha merkadu, maibé tanba saida mak hanoin liu ba sa’e karreta luxu no hakarak tuur iha AC laran”, dehan Elianus, iha Dili, foin lalais ne’e.

Haree ba kondisaun moris povu nian maka MUTL la konkorda bainhira sosa karreta foun ba deputadu sira.

Bainhira PN sosa nafatin karreta foun maka MUTL prontu hamosu trajédia foun, tanba kaer ho prinsípiu ba ukun rasik aan katak, liberta pátria no liberta povu.

Nia dehan, uluk eroi sira luta liberta pátria ona no MUTL oin iha nia pozisaun firme nafatin hodi luta ba interese komun, injustisa sosiál, korrupsaun no esplorasaun ba ema.

Antes ne’e, Parlamentu Nasionál (PN) diskute ona hodi prevé osan atu halo rekizisaun sosa karreta foun ho marka Mitshusibhi Pajero hamutuk unidade 65 hodi fasilita deputadu ida-idak.

Seidauk iha konfirmasaun klaru kona-ba tipu karreta ho marka Pajero ne’e, maibé osan ne’ebé tau hamutuk $2.665.000. Signifika kada karreta foun ne’e sei ho folin $41.000.

Tuir lista presu karreta Mitshubishi Pajero tinan 2018 ho folin variedade konforme ninia tipu. Presu tuun liu maka Mitshubishi Pajero Sport Dakar 4X2 A/T folin $35.400, Pajero Sport 4X2 Ulimate AT folin $36.933, Pajero Sport 4x2 Ultimate Quartz White Pearl AT folin $37.133, no Pajero Sport Dakar 4x4 A/T folin $44.200.