Taur dehan, Dili sidade kapitál nasaun de’it maka governu labele rezolve problema bee moos, saa tan povu iha munisípiu lalika ko’alia tan.

“Ko’alia kona-ba bee moos laiha, ne’e ita iha problema boot, ne’e Timor laran tomak. Ha’u admiradu loos, tanba iha suku ne’ebé ha’u vizita iha Dili laran agora ba Bemori, Bekora –Kamea, Kuluhun, Lahane Orientál, ema hotu-hotu ko’alia kona-ba bee,” dehan PR Taur durante hala’o diálogu komunitariu ho povu Suku Bemori, Postu Administrativu Nain-Feto, Munisípiu Dili, Tersa (24/01).

Xefe Estado sente preokupadu, vizita suku sira iha Dili, problema bee moos mak sai asuntu prioridade hosi povu nia problema.

Tanba durante vizita suku 380, nia resik haree povu balun moris riku ho bee moos, maibé povu balun ne’ebé hela iha foho lolon krize bee moos.

“Ha’u hakfodak no ha’u dehan katak, hanoin katak iha foho maka bee laiha, afinál iha ne’e (Dili) mós bee laiha hotu,”tenik nia ho hamnasa.

Matan Ruak husu atu povu mós tenke iha konxiénsia, bainhira governu fornese ona bee moos tenke uza ho didi’ak no labele estraga bee.

Iha fatin hanesan, komunidade suku Bemori, Francisco da Costa hato’o preokupasaun kona -ba bee moos laiha hodi bele uza ba nesesidade loro-loron.

“Ami iha suku Bemori ne’e menus tebes bee moos, tanba ne’e ami husu ba Na'i Prezidente lori hela ami nia halerik ne’e hato’o ba Governu, atu nune'e sira bele tau matan hela mai nia susar ne’e,” tenik nia.       

Nune’e, mós Maria José Alberto husi aldeia Haas-laran Suku Bemori, hato’o mós preokupasaun hanesan kona-ba bee moos.

Nia dehan, governu servisu hamutuk ho governu Japaun harii tiha ona tanke bee moos I no II iha Mota Komoro Ulun, Ponte Bekora nian, Lahane, maibé tanba saida maka povu Dili sei kontinua sofre kona-ba bee moos governu tenke buka alternativa atu rezolve.