“Ha’u la iha kompeténsia atu ko’alia kona-ba ida ne’e, maibé kompeténsia ba Prezidenti da Repúblika Taur Matan Rua atu nomea ema seluk hodi troka ha’u,” dehan Prezidente TR, Guilhermino ba jornalista, horisehik.
Prezidente TR informa kestaun ne’e, hodi responde ba preokupasaun, Deputadu Parlamentu Nasionál Komisaun A Trata Asuntu Lei Arão Noe ne’ebé husu atu PR Taur troka Prezidente TR, tanba atuál Prezidente TR, Guilhermono moras.
Nia dehan, durante ne’e nia servisu tribunál nia la’o di’ak hela, mezmu nia moras, maibé kontinua servisu nafatin ba estadu nia interese .
Arão dehan Konsellu Superiór Mestradu Judisiál halo ona rekomendasaun hodi hapara servisu Presidenti Tribunál Rekursu,atu deskansa hodi halo tratamentu ba nia saúde.
Nia hatutan, atu funsiona servisu judisiáriu iha Tribunál Rekursu estadu tenke halo ona avaliasaun servisu ba órgaun judisiáriu sira nian.
“Nomeasaun kargu ne’ebé’ iha tuir konstituisaun ne’e vale ba tinan haat, maibé ohin loron Prezidente TR seidauk troka,” hateten Arão.
Entretantu, ne’e mós Presidente Asosiasaun Majistradu Judisiáriu Timor-Leste, Antonino Gonçalves husu atu troka Prezidente Taur uza nia kompeténsia turi artigu 124 númeru 3 hateten katak, tenke haree ba nia mandatu karik nia mandatu hotu mak foin bele troka nia.
“Iha Parte ida ita tenke haree ba nia mandatu hotu, maibé, hanesan impedimentu ba nia kondisaun saúde PR tenke nomea fali ema seluk,” dehan Antonino.
Prezidente TR simu pose iha tinan 2013 no ninia mandatu servisu sei remata iha Abríl 2017.
Antes ne’e, Prezidente TR ho kondisaun moras kaer ai tonka ba hasoru malu ho PR Taur Matan Ruak iha Palasiu Governu hodi diskute ninia kondisaun saúde no servisu tribunál nian.
