“Ita nia rekursu komesa tun, ita nia nesesidade komesa aumenta, maibé aproveitamentu ne’e ladún másimu," dehan Prezidente Repúblika, Taur Matan Ruak, bainhira halo diálogu komunitaria iha Suku Bemori, Na'in Feto-Dili, Tersa (24/1).
Nia dehan, preokupasaun ne'e la'ós ema nian de'it, maibé to’o própriu sidadaun normál iha área rurál sira mós preokupa.
Nia kompara uluk sira iha ai-laran, iha liafuan ida dehan, kuandu hahán barak, han natoon para kabun labele boot, kuandu hahán laiha han natoon para labele mate.
“Maibé ita agora ne’e hahán barak, ita han to’o ita nia kabun boot, kuandu laiha fali, ita kesi sintu aperta, dala ruma ita tuku malu tan iha uma laran, ne’e maka ita Timor nia problema, tanba ita la jere di'ak, ita ultrapasa buat ne'ebé labele. Nune'e iha tempu ne'ebé di'ak, ita sente di'ak, maibé kuandu iha tempu ne'ebé susar, ita sei arrepende,” dehan Xefe Estadu.
PR afirma tan, ko'alia kona-ba sustentabilidade programa no projetu ida-idak nian agora daudaun mina iha Kitan maran ona, Bayu Undan menus tan daudauk ona. Tanba ne'e sei hasoru dezafiu boot.
Agora daudauk Timor-Leste iha osan uitoan, maibé tinan-tinan sempre hasai ne'ebé kompara ho osan tama menus liu.
Entretantu, nia afirma kona-ba Governu harii rasik fatin kombustivel hodi fa’an mina, maibé oras ne’e Governu fó hela ba kompañia privadu sira maka kaer, ne’e la lójika.
"Bele ka lae, ita nia Governu harii rasik kombustivel, maibé iha ita nia rain realidade ita iha kompañia Timor Gap ne’e kompañia Estatál," tenik nia.
Nia haktuir, Timor Gap loke fatin kombustivel iha Suai, atu fa’an mina ba karreta sira. Maibé, atu abastese sentrál elétrika Hera ho Betanu Governu fó fali ba kompañia privadu, lójika ne’e iha ne'ebé, lójika laiha.
Tuir PR Taur katak, kompañia Estadu nian ba fa’an fali mina iha estrada ibun no kompañia privadu sira ba fornese fali ida barak ne’e.
Timor Leste bele halo komunikasaun, maibé Governu hateten katak, Estadu maka halo lukru laiha, maibé kompañia privadu sira hadau malu atu sosa, ne’e lukru iha ka laiha.
“Maibé ha'u (Taur) la hatene, ne’e problema saida maka ita iha, maibé ita hanesan nasaun tenke moris di'ak,” afirma PR Taur.
Komunidade Suku Bemori, Joanico da Costa Belo hateten, durante ne'e nia servisu iha kompañia esplorasaun ida no identifika katak rikeza mina no gás Timor-Leste nian menus ona.
Ne'e duni, nia husu Governu kria rasik fatin kombustivel, inklui fornese mina ba eletrisidade atu bele hetan retornu hodi selu funsionáriu sira no mós dezenvolve Timor Leste.
