Iha prátika, iha 2016 ME transforma ona eskola Sekundáriu Jeral 28 Novembru ba eskola  vokasional indústria maibé too agora profesór sira iha eskola refere seidauk kompriende loloos kona ba konteúdu loloos husi eskola vokasionál indústria ne'e rasik tanba la iha esplikasaun ka klarifikasaun ba profesór sira.

Ho konfuzaun ne'e maka profesór sira koko hodi husu beibeik ba ME  atu bele halo diálogu hodi hetan esplikasaun klaru husi Ministru no vise Ministru sira, maibé Ministériu rasik nunka responde profesór sira nia pedidu.

Nune'e, iha loron 1 de Fevereiru 2017, sindikatu profesór husi eskola Sekundária Jerál 28 Novembru hatama karta petisaun ba Parlamentu Nasionál (PN)  hodi husu deputadu sira atu bele hato’o preokupasaun sira nian ba ME liuliu bele halo diálogu.

Porta voz sindikatu profesór Cosme Roberto hatoo kestaun ne’e hafoin hatoo petisaun ba Parlamentu Nasional kuarta horsehik (01/02).

Nia hateten, polítika governu liu husi ME hakarak atu transforma eskola Sekundária Jerál 28 Novembru ba fali Eskola Vokasionál Indústria maibé to’o oras ne’e parte ME seidauk halo klarifikasaun ruma ba prosesu ne’e.

Cosme informa, prosesu transformasaun ne’e parte sindikatu profesór konkorda maibé ME tenke halo klarifikasaun ruma atu nune’e profesór sira ne'ebé durante ne’e halo jestaun ba eskola ne’e bele hatene no labele hamosu konfuzaun.

Hataan ba preokupasaun ne'e husi Parlamentu Nasionál (PN) Adérito Hugo nudar Prezidente hateten, polítika governu hakarak atu muda Eskola Sekundária Jeral sira balun transforma ba Eskola Vokasionál tanba hare ba Timor laran tomak Eskola Sekundária Jerál mak barak liu.

Hugo dehan, prosesu transformasaun ne’e ME halo ona estudu barak kona ba prosesu ne’e maibé parte husi sindikatu profesór sira iha duvida entaun sira mai husu atu PN liu husi Komisaun Espesializada sira buka tempu hodi halo akompañamentu ba kestaun sira ne'e.

Prezidente PN moos promete katak nudar sidadaun no reprezentante povu sei ajuda  sindikatu profesór sira ne’e hodi  husu ba ME atu bele marka audiénsia ruma hodi buka dalan atu bele foo resposta klara.