Segundu Komandu PNTL Munisípiu Dili, Superintendente Asistente Euclides Belo hateten, PNTL sei sosa ekipamentu detetór hodi monta iha Dili laran hodi deteta bainhira transporte sira hirak kontra regra, ekipamentu ne’e tiru de’it.

Bainhira ita identifika, ita sei tiru de'it motór ho karreta ne’ebé kontra sináis tránzitu ne’e,” dehan nia, iha servisu fatin, horisehik.

Nia dehan, Komandu PNTL hato’o ona planu ba Komandu Jerál PNTL hodi sujere sosa ekipamentu ne’e atu bele deteta sé de’it maka kontra sináis tránzitu. Bainhira sasán ne’e identifika Polisia sei tiru motór ho karreta ne’ebé nakar iha estrada.

Belo afirma, motorista sira hakarak ka lakohi tenke kumpre regra tránzitu maka hanesan ne’e, implementasaun ne’e rigorozu ba movimentu transporte sira atu regula didi’ak sira ne’ebé gosta lori viatura kontra sináis tránzitu.

Tuir planu ekipamentu ne’e sei sosa iha tinan ne’e hodi monta iha estrada ibun atu bele apoia servisu PNTL nian.

Nia afirma, antes ne’e Timor-Leste sei iha tranzisaun ONU nian sasán ne’e iha maibé avaria ona. Ne’e duni, Polisia liu husi tránzitu iha planu atu sosa ekipamentu ne’e.

Tanba ne’e, bainhira ekipamentu ne’e iha ona PNTL nia liman, sei implementa rigorozu ba viatura ne’ebé gosta nakar halai iha kapitál Dili la tuir regra.