Iha ninia vizita tomak enkontru ho povu iha Munisípiu 13, Postu Administrativu 65 ho suku no aldeia sira joven sempre ezije governu atu kria sentru formasaun no treinamentu ba sira.

“Realmente problema ne'ebé ha’u haree iha fatin-fatin, ita la organiza ita nia-an. Bainhira ita halo serbisu ruma ita tenki hatene ema ruma, ne’e normalmente ita halo,” dehan PR hodi responde ba preokupasaun juventude Suku Bairupite, durante diálogu iha Suku Bairupite, kuarta (01/02).

Taur husu atu juventude sira servisu hamutuk ho autoridade lokál atu buka informasaun ba sentru formasaun sira ne’ebé SEPFOPE akredita hanesan, SENAI Bekora, Tibar, Don Bosco ho sentru formasaun seluk tan.

Nia dehan, governu kria ona sentru formasaun lubuk ida, joven sira maka tenke iha inisiativa atu ba buka kursu no tuir formasaun.

“Ha’u rekomenda ba joven tenki hakbesik aan ba autoridade lokál hodi kanaliza ba ministériu relevante fó informasaun ba imi,” dehan nia.

Xefe Estadu dehan, durante ne’e, MKIA, SEPFOPE no SEM kria sentru formasaun lubuk ida no joven barak maka tuir ona formasaun.

Fatin hanesan, Reprezenta Juventude Feto Suku Bairupite, Júlia Fatulice  durante ne’e sira preokupa la hetan formasaun ruma atu aumenta feto nia kapasidade.

“Ha’u hato’o ba primeira dama atu tau matan ba ami ba ami feto sira, atu hasa’e ami nia kapasidade liu husi formasaun sira,” dehan Júlia.

Nune’e mós Reprezenta Juventude mane, Marcos dehan realidade hatudu katak, joven barak remata eskola sekundáriu no universidade la hetan servisu.

Ne'e duni, nia husu atu governu kria formasaun barak liután para bele redús númeru dezempregu iha TL.

Formasaun seluk maka Marcos husu atu governu kria formasaun aprende lian Inglés no Portugés.