Tuir populasaun,Odete da Silva hateten área potensiál turístika hanesan iha munisípiu Baukau iha tasi ibun Vata Boo no turizmu istória hanesan fatin abrigu ba gerrilleiru sira iha Fae-Lehe presiza tebes atu tau atensaun hodi dezenvolve, atu nune’e turista internasionál no husi turista doméstika sira bele mai pasa tempu iha fatin sira ne’ebé interesadu.

Nia hatutan, povu Baukau ohin loron sente setór ekonomia iha munisípiu ne’e fraku tebes, tanba área importante sira ne’ebé atu hatama reseitas ba kofre estadu to’o ohin loron seidauk bele dezenvolve ne’e hanesan fatór ne’ebé bele impede hodi labele hasa’e kresimentu ekonomia povu.

Tanba ne’e, nia husu governu atu bele halo planu no identifika área sira ne’ebé potensiál ba turizmu hodi dezenvolve ona hodi fó reseita ba governu lokál atu bele halo fali dezenvolvimentu iha munisípiu.

Hataan ba preokupasaun ne’e, Presidente Repúblika, Taur Matan Ruak rekoñese, durante ne’e dezenvolvimentu tinan 15 la’o iha nasaun ne’e orsamentu estadu 90% mai husi reseita petrolíferu, Tanba TL rasik seidauk iha reseita ne’ebé atu troka reseita mina no gás.

Tau dehan, ohin loron mina no gás iha tasi Timor mós komesa menus ba daudaun ona no produsaun mós tun ba beibeik no folin mina mundiál tun sei fó impaktu ba dezenvolvimentu nasionál.

Taur husu atu governu tenke investe makas iha setór produtivu sira hanesan turizmu, agrikultura, edukasaun no saúde hodi hatama reseita ba estadu.

“Ha’u hanoin ita hotu tenke servisu makas, la bele kalan toba to’o fali tuku 9 dadeer mak hadeer, tenke dixiplina ba tempu, la bele halo aan badinas servisu” dehan PR Taur durante diálogu ho komunidade, Sesta (03/03).

Xefe Estadu fó korajen nafatin ba povu tomak atu bele hametin nafatin estabilidade hodi kria relasaun di’ak ba malu atu bele servisu hamutuk foti TL.