Komunidade sira kestiona tanba hare ba kazu lubuk ida mak agora daudaun setór justisa husik hela ema boot sira ne’ebé komete krime korrupsaun maibé lao livre hela.
“Setór justisa ladún la’o diak iha pais ne’e, tanba ne’e husu Prezidente Republika (PR) atu hare didiak kestaun ne’e,” dehan Revelino Goveia Ximenes iha diálogu komunitáriu ho Prezidente da Republika (PR) Taur Matan Ruak iha salaun Eskola Filiál Xina Bairo Formoza-Dili Sesta foin lalais ne'e.
Hatán ba kestaun ne’e, xefe Estadu Taur Matan Ruak hateten setór justisa serbisu diak, simplesmente Governu mak tenke investe orsamentu boot ba iha area justisa.
Taur mós iha esperansa katak ba oin setór hotu iha nasaun nee sei la'o di'ak liu tanba agora daudaun TL sei iha idade kiik no nia husu atu setór hotu servisu maka’as ba povu nia di'ak.
Entretantu iha dialogu nee Prezidente da Repúblika (PR) Taur Matan Ruak apresia ho komunidade Suku Grisenfor, tanba komunidade sira laiha ida mak hato’o sira nia preokupasaun kona ba bee moos no ba formasaun.
Taur garante katak, komunidade sira iha Suku Grisenfor asesu informasaun ne’ebé di'ak.
Nia konta tuir iha Suku sira seluk iha Dili laran maioria husu atu apoiu loke fatin formasaun, no seluk tan.
Tuir observasaun Jornalista INDEPENDENTE nota katak iha diálogu ne’e hetan partisipasaun husi Ângela Freitas hanesan kandidatu feto úniku ba Prezidente Repúblika períodu 2017-2022.
