Dadus ne’e foin mak preleminariu. Iha posibilidade númeru uma ne’ebé hetan estragus no vítima sira seluk bele aumenta, tanba udan no anin sei kontinua nafatin.
Adjuntu Komandante PNTL Munisípiu Baukau, Superintendente Asistente, Joni Viana hateten, Udan ho anin akontese dezde Sábadu (4/2), nune’e to’o iha Tersa (7/2) rezulta ona vítima lubuk ida.
Nia dehan, vítima na’in rua ne’ebé mate ne’e husi Suku, Defa-uase, Postu Baguia. Vítima sira ne’e mate tanba hanehan husi uma.
Entretantu, vítima na’in rua seluk ne’ebé kanek akontese iha Suku Atelari.
Entretantu, rezultadu preliminariu husi PNTL Munisípiu Baukau, uma sira ne’ebé hetan estragus mak hanesan Venilale uma 83, Samalari uma 30, Gariuai uma 20, Uailili uma 8, Bahu'u uma 6, Buibau uma 3, Laga uma 2 no Tirilolo uma 2.
