Iha diálogu Komunitáriu iha sesaun husu no hataan, Alípio Perreira Rodrigues husu estadu atu harii postu saúde iha sira nia suku tanba povu hala’o tratamentu saúde la’o do’ok tebes no mos tenke kanaliza bee moos mai too iha sira nia suku.
“Ami nia suku seidauk iha Postu Saúde. Ami povu kiik kuandu moras la’o do’ok tebes. Tanba ne’e ami husu estadu atu harii postu saúde iha ami nia suku no mós kanaliza be moos too iha ne'e,” Alípio husu ba Prezidente Repúblika Taur Matan Ruak, Kuarta (08/02).
Nia observa katak, durante ne’e povu ki'ik sira ne’ebé moras tenke la’o dook mak foin bele halo tratamentu ba sira nia moras, nune'e mós povu husi sira nia suku too agora obrigadu tenke konsumu bé merak.
Entretantu Feliz Cardoso Barros iha nia afirmasaun, estadu hakarak povu moris saudável, maibé realidade povu ki’ik ne'ebé moris iha área rurál la asesu bee mós entaun povu susar atu moris di'ak.
Hataan ba preokupasaun ne’e Prezidente Repúblika Taur Matan Ruak foo esperansa katak, husi nia parte hein katak orsamentu 2017 bele rezolve problema bee moos balun ne'ebé povu preokupa inklui hari sentru saúde hodi kompleta polítika governu nian.
PR Taur husu ba povu atu pasiénsia hodi hein prosesu dezenvolvimentu ne'ebé mak la’o tanba governu iha programa no planu atu hadi'a povu nia moris.
Observasaun Jornalista INDEPENDENTE nota katak, maske komunidade sira halerik ba bee mós maibé iha fatin refere nakonu ho bee ne’ebé iha hodi bele uza ba nesesidade lor-loron.
