Iha momentu hanesan deputadu sira mós ba governu atu harii Kofi Annan nia-estátua iha Timor-Leste, tanba husik hela obra boot iha istória luta independénsia Povu nian.
Prezidente Bankada FRETILIN, Aniceto Guterres hatete, matebian eis- Sekjer ONU Kofi Annan merese duni atu povu Timor-leste fó omenajen tanba liu husi nia-desizaun sira bele kontribui ba independénsia Timor.
“Ita labele fó de’it últimu omenajen, maibé Estadu Timor tenke buka estrada hodi tau naran rua de Kofi Annan atu bele dignikfika nia-kontribuisaun”, dehan nia, iha Uma Fukun PN, horisehik.
Iha fatin hanesan, deputadu Antonino Bianco hatete, kontribuisaun Kofi Annan ba independénsia ne’e labele sura, tanba ne’e merese estadu no povu fó omenajen ba nia.
“Ha’u husu ba governu atu harii estátua Eis-Sekjer ONU Kofi Annan nian iha Timor”, dehan nia.
Bianco hatutan, Governu ne’e presiza identifika fatin ruma hodi harii ninia estátua, atu bele hatudu faktu istóriku ba jerasaun foun sira hodi bele hatene kontribuisaun ninian mai Timor.
Entretantu, Prezidente Parlamentu Nasionál, Arão Noe de Jesus hatete, órgaun soberanu daruak ne’e deside realiza plenária estra-ordinária hodi fó votu pezar unanimidade ba Kofi Annan nia mate ne’e hanesan onra ne’ebé povu Timor fó nia liu husi kontribuisaun ne’ebé halo ona ba Timor.
“To’o mai ninia tempu mak foin bele halo desizaun ba Independénsia povu Timor nian, tanba ne’e nia merese fó omenajen husi povu Timor”, tenik nia.
Prezidente PN sei fó instrusaun ba tékniku gabinete nia atu prepara karta ba Primeiru Ministru atu bele konsidera hodi buka dalan ida atu tau ninia naran no harii estátua ka oinsá ne’e depende ba ezekutivu sira nia-desizaun.
Estadu Timor Leste liu husi Governu agradese ba Eis-Sekretáriu Jerál ONU, Kofi Annan ne’ebé deside destinu Timor-Leste haketak husi Indonézia.
Timor Leste sentimentu boot tanba lakon estadista, durante mandatu esforsu makaas ba Timor-Leste ikus mai hetan Independénsia. Ne’e duni, Timor Leste la haluha esforsu Kofi Annan ba nasaun ne’e.
“Kofi Annan halo parte ba ita nia istória, ne’ebé Estadu Timor Leste tranzmite ba ninia família pessoalmenta ba eis Sekretáriu Jerál ONU sentidu kondolénsias”, dehan PM Taur.
Maibé, antes ne’e, enkontru Konsellu Ministru aprova rezolusaun ida atu delega eis-Prezidente Repúblika, Kay Rala Xanana Gusmão, partisipa serimónia funebre Kofi Annan nian.
Tanba ne’e, Xefe Governu lori estrutura no povu Timor-Leste nia-naran hato’o sentidu profunda ba família matebian nu’udar belun di'ak ba Timor-Leste durante luta atu ukun rasik aan.
