Ministru Negósiu Estranjeiru no Kooperasaun (MNEK), Dionísio Babo Soares hateten, embaixada Timor-Leste ne'ebé instala iha rai li'ur oras ne’e enfrenta krize finanseiru no posibilidade balun sei taka.
Nia dehan, bainhira Governu anteriór moris ho orsamentu duadesimu dívida barak mak aumenta, tanba embaixada barak mak labele kumpre ho regra sira sistema free balance la simu.
Montante Orsamentu ne’ebé Governu aloka ba embaixada sira sistema free balance la simu, kuaze osan tokon $1 resin mak fila ba kofre Estadu, tanba ezekusaun la hotu no arenda ba embaixada sira balun mós hotu ona.
Ne’e duni, MNEK propoin rihun $500.000 hodi halo ezersísiu internu, hodi utiliza orsamentu ne’e ho transferénsia no akontabilidade atu selu dívida sira.
“Ita nia embaixada balun osan laiha ona no ita nia embaixada balun arenda hotu no ema atu duni sai tanba embaixadór balun osan laiha”, dehan Dionísio, iha Uma Fukun PN, horisehik.
Embaixadór balun iha rai li'ur konta bankária mamuk ona, nune’e laiha saldo ruma atu estabelese programa atividade embaixada Timor-Leste nian iha rai li'ur ne’ebá.
Ne’e duni, Iha diskusaun OJE 2018, MNEK propoin $500.000 hodi utiliza ba pagamentu dívida embaixada sira iha rai li'ur ne’ebé hetan ameasa.
