Deputadu Parlamentu Nasionál, José Luis Guterres hateten, bainhira timoroan sira iha rai ne’ebá ladún seguru, Governu Timor-Leste presiza haree atu bele halo transferénsia nune’e labele fó risku ba vida estudante sira.

“Kuandu situasaun país ne’e nian mak la seguru Estadu Timor tenke buka alternativa hodi evakua estudante sira sai husi nasaun ne’e hodi transfere ba nasaun seluk”, dehan José Luis Guterres, iha Uma Fukun PN, horisehik.

Eis diplomata timoroan ne’e mós husu ba Governu Kabuverde atu investiga insidente premanizmu ne’ebé atake sidadaun Timor iha ne’ebá.

Nia dehan, asaun ne'ebé premanizmu kabuverdianu sira halo ba estudante bolseiru timoroan konsidera krime. Tanba ne’e, autoridade nasaun Kabuverde tenke investiga sidadaun ne'ebé komete krime ne’e.

Nune’e, husu mós ba ministériu negósiu estranjeiru no kooperasaun (MNEK) atu halo asaun imediatamente hodi liga ba ministériu negósiu estranjeiru Kabuverde hodi asegura sidadaun Timor iha ne'ebá.

Iha fatin hanesan, Deputadu Eládio Faculto hatete, premanizmu Kabuverde ne'ebé ataka estudante timoroan hamutuk dala ualu (8) ona. Akontesimentu balun bandidu sira baku estudante feto timoroan no hadau sira ninia sasán.

Iha akontesimentu foin lalais ne’e konsege hakanek estudante ida ho naran Octávio, maibé parte seguransa nasaun ne’e nia la halo asaun ruma buka tuir no kaptura nia-sidadaun.

“Ne’e halo ba ita nia ema ne’e kruél tebes, tanba ne’e presiza Estadu foti medida hodi evakua estudante sira ba fatin seluk”, tenik nia.

Nune’e, governu liu husi ministériu edukasaun antes ne’e lori estudante timoroan ba eskola iha ne'ebá la halo peskiza kona-ba situasaun seguransa Kabuverde nian no la analiza mós kondisaun universidade iha fatin ne'ebé estudante sira halo estudu ba.

Tuir deputadu ne’e, universidade ne'ebé bolseiru sira halo estudu ba ne’e laiha kondisaun, tanba universidade ne’e iha sala de aula akumula estudante neen nulu resin. Ne’ebé indika katak laiha kondisaun.

Nune’e mós dosente sira ne'ebé hanorin iha universidade ne’e mós la halo atendimentu ne'ebé balansu. Deskonfia halo fali diskriminasaun hasoru estudante timoroan sira.

“Haruka sira ba eskola fali iha nasaun seluk hanesan Brazíl no Portugál”, dehan Eládio.

Tuir nia, kuandu estudante sira ne’e mak governu la evakua sira nia inan-aman sei foti medida hodi evakua nia oan sira atu nia vida labele ameasadu.

Iha fatin hanesan, Deputadu Virgílio Hornai hatete, iha nasaun Kabuverde laiha sistema bankária ne'ebé di'ak hodi halo transfere osan ba estudante sira, tanba ne’e transferénsia osan ba estudante sira sempre tarde.

Ne’e duni, husu ba governu iha futuru haruka estudante sira ba eskola iha estranjeiru tenke haree didi'ak situasaun hotu atu sidadaun sira ba eskola hakmatek hodi konsentra ba estuda.