Delegasaun AATL ba PN hodi marka audensia ho deputadu husi komisaun F atu ko’alia kona-ba Esbosu Lei ne’ebé deputadu sira produs ona.

Reprezentante delegasaun AATL, João Minta hatete, esbosu lei ne’e atu garantia direitu autor sira nune’e hamenus atividade plagiarizmu.

“Ami husi Asosiasaun Almamor no Asosiasaun Muzika Timor-Leste nian mai husu deputadu husi Bankada 4 atu nune’e sira bele aselera lei ne’e, tanba durante ne’e artista sira sai vitima,” dehan nia.

Iha oportunidade ne’e, João Minta kritika mós governu TL ne’ebé dala-barak konvida no selu karun artista estranjeiru hodi mai anima povu TL.

Molok ne’e delegasaun AATL hasoru-malu ona ho Bankada FRETILIN, CNRT, Frente-Mudansa no PD.

Iha fatin hanesan, kantor Timor-oan Alex da Costa hato’o ninia preokupasaun kona-ba ‘kustumi’ aat governu TL ne’ebé gosta konvida artista estranjeiru mai TL.

Tuir Alex, governu tenke fó prioridade ba Timor-oan sira, liliu artista lokal atu hatudu sira-nia talentu ba muzika.

Nia dehan, atu promove talentu artista foin-sa’e, governu tenke iha planu hodi investe iha area muzika no bele kria lei ida atu regula artista sira nune’e labele mosu atividade plagiarizmu.

“Ba futuru Kuandu artista sira atu ba kanta iha fatin ruma tenke estabelese kontratu,” dehan Alex.

Tuir nia, tempu to’o ona ba parte hothotu bo’ok an hodi ezije ba guvernu atu tau-matan ba artista Timor-oan hodi bele dezenvolve an.