Prezidente CNRT ne’e hatete, nia lakohi soe nia tempu hodi ba hasoru-malu ho jeneral sira.
“Ohin ita-nia kandidatu dehan nia atu bolu sira atu ko’alia, atan-oan ha’u ne’e kuitadu, atan-oan ha’u gerileiru oan ida, labele kompara ho jenerál oan sira, mamuk ne’e,” dehan Xanana iha kampaña kandidatu PR númeru 1, José Ramos Horta, iha antigu Asrama 745, suku Fuiloro, Postu Administrativu Lospalos, Munisipiu Lautem, , Domingu (11/04).
Xanana hatutan, nia nunka tama iha universidade tan ne’e nia moe bainhira atu ba koalia fali ho Doutor no Cum Laude sira.
“Ida fali dehan loron 4 Maiu atu bolu lider nasionál, bolu mós ha’u, ha’u dehan deskulpa, lalika perde tempu. Tanba ata-oan ha’u ne’e atu ba ko’alia saida? ba hasoru jeneral iha ne’ebá ha’u nakdedar, tauk ne’e,” deklara Xanana.
Xanana hato’o deklarasaun ne’e relasiona ho promesa kandidatu PR, Horta, atu halo dialogu bainhira eleitu sai PR.
Horta dehan, nia hakarak atu halo dialogu ho lider partidu Fretilin sira bainhira nia eleitu ba Prezidente Repúblika.
Kandidatu PR ne’e dehan, nu’udar fundadór ASDT no Fretilin, bainhira nia eleitu nia sei buka atu hakoak Prezidente Fretilin, Lú Olo, ho Sekretariu Jeral, Mari Alkatiri.
“Ha’u hatete ba ha’u-nia alin Lú Olo, ha’u manan karik, ha’u sei hakoak ita-boot no sei buka ita-boot atu ita buka servisu hamutuk ba oin. Ha’u manan karik ha’u sei buka Mari Alkatiri ho lider sira seluk iha Fretilin,” deklara nia.
Horta hatutan, nu’udar fundadór ASDT no Fretilin, nia hatene no respeita istoria Fretilin nia, tan ne’e maske durante ne’e ema Fretilin sempre ataka nia, maibé nia la rai odiu ba sira.
“Rai ne’e labele iha inimigu, Timor-Leste hatudu ba mundu ezemplu di’ak ida, rekonsiliasaun nasionál di’ak loos ho Indonézia. Ne’e duni entre lider politika sira, eleisaun liu tiha, ita tenke buka, ne’e duni Prezidente Republika ne’e sei buka diálogu ho sira hotu atu povu bele moris hakmatek, atu mundu bele haree Timor-Leste iha konfiansa iha mundu nia matan, atu ita bele halo inisiativa oioin, povu, joven sira, iha arte no kultura,” nia hatete.
