“Ami nia respeita no hakuak bo’ot ba traballadór Timor oan sira ne’ebé servisu iha Irlandia, Inglatera, Súl Korea no Austrália. Tanba ho imi nia servisu foho sira iha Lautem mesak uma-mutin, ne’e duni imi maka eroi kontinuador,” informa Mariano Assanami Sabino iha kampaña segundu volta kandidatu Prezidente Republika, José Manuel Ramos Horta, iha kampu eis asrama 745, Suku Fuiloro, Postu Administrativu Lospalos, Munisipiu Lautem, (11/04).
Nia haktuir, joven barak ba buka servisu iha rai liur hodi ajuda alin sira, inan-aman sira halo uma mutin iha Aldeia Ira-ara no fatin-fatin, tanba servisu iha rai laran laiha.
“Ema primeiru ne’ebé servisu iha Inglatera, Oxford ita nia maun, alin kamarada ka kompaneiru Savio, Lautem oan sira maka loke dalan hodi ema hotu ba buka servisu iha ne’ebá,” tenik nia.
Reprezenta kandidatu Prezidente Repúblika, José Ramos Horta fó parabens no hakuak bo’ot ba Timor oan sira ne’ebé servisu iha ema nia rai, tanba sira maka halo Timor-Leste nia naran morin.
“Imi nia servisu bele ki’ik, bele halo saida de’it iha ema nia rai, maibé ho imi nia kontribuisaun maka hatama osan bo’ot, depois osan mina rai, tanba ne’e maka ha’u hakruk no husu deskulpa, mantein servisu ho dignu iha ema nia rai hodi hamorin Timor-Leste nia naran iha fatin seluk,” nia relata.
Iha fatin hanesan, Kandidatu Prezidente Repúblika, José Manuel Ramos Horta hateten, bainhia sei asumi pasta nu’udar Ministru Negosiu Estranjeiru Kooperasaun (MNEK) iha 2003, nia maka ko’alia ho nasaun Súl Korea no Austrália hodi haruka Timor oan ba servisu iha ne’ebá.
“Ha’u defende timor oan sira ba servisu iha rai liur, mesmu ita nia ekonomia maka’as, di’ak, ita nia joven sira tenke ba liur, nune’e bele manan osan, ita la konsege selu hanesan iha Inglatera ka Alemaña ne’ebá, sira manan osan kada oras, dduke hanesan governu selu asesor lubuk ida selu osan bo’ot, rihun $5 no rihun $10,” tenik nia.
Nia parte aseita inisiativa ida ne’e, ne’e duni haruka traballadór ba servisu iha rai liur, nune’e bele hetan matenek hodi loke bisnis iha Inglatera no Austrália, ida ne’e di’ak tebes.
Nia informa, Prezidente Repúblika ida ne’e ho Governu no maun boot Xanana sei esforsu maka’as hodi tau matan ba joven no kosok oan sira.
