Assanami: Sé De’it Mak Manan, Hotu-Hotu Nia PR

By Aquino Gomes Abril 20, 2022 1101
Prezidente Partidu Demokrátiku, Mariano Assanami Sabino. Foto:INDEPENDENTE. Prezidente Partidu Demokrátiku, Mariano Assanami Sabino. Foto:INDEPENDENTE.

DILI: Partidu Demokrátiku (PD) husu juventude no populasaun territoriu nasionál tomak kontribui estabilidade iha eleisaun Prezidensiál segunda ronda, tanba sé de’it maka eleitu, ne’e ema hotu nia Prezidente Repúblika.

Prezidente Partidu Demokrátiku, Mariano Assanami Sabino, husu populasaun sira hotu hakmatek ba vota kandidatu ida ne’ebé di’ak ba Timor-Leste nia futuru tinan lima (5) mai ne’e.

“Ba vota sé de’it mak eleitu sai Prezidente Repúblika, nia mak prezidente Timor-Leste no nia mak ita hotu nia prezidente repúblika,” dehan nia, iha sede Partidu Demokrátiku, Kolmera, Segunda (18/4).

Assanami dehan, vox populi, vox Dei, lian povu nian, lian Maromak nian, rezultadu sai, sé deit mak eleitu hotu-hotu tenke simu ida ne’e.

Tanba ne’e, husu jerasaun foun sira labele uza media sosiál hodi mal trata lider nasional, maibe hato’o opiniaun, tanba joven sira- nia ezistensia mak hametin demokrásia iha rai-laran.

“Husu inan-aman sira hotu hakmatek, nafatin ho vontade ho seriedade ba tuir votasaun. Tanba ita nia vota mak determina ita nia futuru, ita nia votus mak determina mudansa ne’ebé mak ita atu halo ba rai ida ne’e, ita hot-hotu kontribui liu husi votasaun atu halo muda ba ita nia rain,” nia hateten.

Nia hateten, tanba ne’e mak rumoris barak ne’ebé mak mosu dehan iha kilat ilegal no iha buat oioin, ameasa sira ne’ebé mak iha, ida ne’e inimigu ba demokrásia.

Nuudar Partidu Demokrátiku iha responsabilidade atu hato’o katak lalaok sira ne’ebé mak ameasa, sosa povu nia votus, intimida oioin ne’ebé mak mosu, ne’e lalaok sira ne’ebé mak anti demokrátiku.

Tanba Timor-Leste proklama nu’udar Repúblika Demokrátiku Timor-Leste (RDTL), hot-hotu iha responsabilidade atu kontribui atu prosesu demokratizasaun bele la’o diak.

“Jovens sira hotu, atu fila ba ida-idak nia fatin atu bele kontribui paz no estabilidade no responsabilidade atu vota, tanba vota ne’e ba futuru ita nian, la’ós deit votus ba tinan lima (5) nian deit, maibé prosesu ba oin ne’e importante tebes,” nia husu.

Maibé nu’udar eis kandidatu mós hakarak apresia, agradese ba hot-hotu ne’ebé mak durante ne’e konfiansa ba kandidatu númeru 16 Mariano Assanami Sabino.

“Ho ida ne’e desizaun partidu ami hot-hotu fó fila-fali konfiansa ba kandidatu númeru 1, José Ramos Horta atu sai prezidente repúblika, ita hot-hotu iha responsabilidade atu kontribui integridade partidu no membru hot-hotu tenke asume responsabilidade atu kumpri desizaun ne’ebé mak partidu foti ona,” nia informa.

Nia husu deskulpa kandidatu Prezidensiál 2022 hotu no líder sira hot-hotu karik iha liafuan balun ne’ebé mak monu ba laran durante kampaña eleitorál.

“Maibé Partidu Demokrátiku mantein nafatin kontribui no nu’udar kandidatu mós mantein kontribui liafuan sira ne’ebé sivilizadu, siviku ko’alia programa hodi rai ida ne’e ba oin,” nia relata.

Nia fundamenta, hanoin buat hotu liu ona, agora hot-hotu hakuak malu ba oin, ba Timor-Leste ida ne’ebé mak diak, Timor-Leste ne’ebé buras no Timor-Leste ida ne’ebé ba timoroan hotu sai numeru 1 rai ida ne’e.

Rate this item
(0 votes)

Independente Digital TV