Bazeia ba dadus eleisaun rua ne’ebé besik liu, eleisaun Parlamentar 2017 no eleisaun Prezidente Repúblika 2022, CNRT sempre hetan vitoria iha kapital Dili.
Iha eleisaun parlamentar 2017, CNRT hetan votus 45.701 iha munisipiu Dili no iha eleisaun PR ronde dahuluk, kandidatu PR ne’ebé CNRT apoiu hetan votus 81.232.
Enkuantu partidu Fretilin iha eleisaun 2017 Fretilin hetan votus 34.523 no iha eleisaun PR ronde dahuluk kandidatu Fretilin hetan votus 27.684.
Maske ho diferensia votus ne’ebé dook tebes, maibé la hamate Alkatiri nia konfiansa atu kandidatu ne’ebé Fretilin apoiu sei konsege manan iha kapital Dili iha ronde daruak.
Aleinde manan iha Dili, Alkatiri hatete, sei iha aumentu votus ba Lú Olo iha munisipiu hotu-hotu iha Timor-Leste.
“Ha'u foin fila husi Lautem, Vikeke no Baukau, iha ne'ebá kedas ha'u dehan Dili mós ita sei manan, ita sei aumenta votu iha Ermera, aumenta votus iha Bobonaro, iha Likisa, iha fatin hotu-hotu, ne'e la iha dúvida. Ita la'ós de'it aumenta ita-nia votus, hatun (votus) Ramos Horta ninia,” dehan Alkatiri liu husi nia intervensaun iha kampaña kandidatu PR númeru 2, Francisco Guterres Lú Olo, iha Tasi Tolu, Dili, Domingu (10/04).
Konfiansa Alkatiri ne’e mosu tanba iha kampaña ronde daruak, Prezidente Partidu Libertasaun Popular, Taur Matan Ruak, mós tuun hodi partisipa iha kampaña kandidatu Lú Olo.
Iha fatin hanesan, Diretór Kampaña José Manuel Fernandes ‘Nakfilak’ hatete, Timor-Leste labele hein tan hateke ba kompozisaun fó esperansa tomak katak kandidatu númeru 2 kandidatu povu tomak nian no sei sai Prezidente Repúblika ba Timor-Leste tomak.
Prezidente Partidu Frente Mudansa, Igino de Jesus hatete, durante governu Aliansa Maioria Parlamentar nia tempu ahi mate permanente, maibé ho apoiu husi Lú Olo hodi promulga Orsamentu Jerál Estadu ikus ahi moris permanente.
Tan ne’e, Prezidente Frente Mudansa ne’e husu ba povu atu vota Lú Olo iha eleisaun ne’ebé sei realiza iha 19 Abril ne’e.
Lú Olo La Partisipa, Taur Subtitui
Kandidatu PR númeru 2, Francisco Guterres Lú Olo la partisipa iha kampaña eleitoral ne’ebé realiza iha Tasi Tolu. Kandidatu refere fó orden ba Prezidenete PLP, Taur Matan Ruak hodi subtitui nia.
Taur hatete, kandidatu Lú Olo la marka prezensa tanba ne'e fó orden ba nia hodi akompaña ho Sekretáriu Jerál Partidu Fretilin, Mari Alkatiri, hodi programa ba povu.
“Ha'u hakarak hatete ba ita-boot sira, tanba saida mak ita-nia kandidatu la mai, tanba ha'u akompaña nia dala ida de'it iha Ermera, entaun nia fó orden ‘Taur Matan Ruak, ita-boot mak tenke akompaña Sekretáriu Jerál ba Tasi Tolu’ ha'u dehan ‘siap komandante’. Ha'u mak mai atu fahe informasaun, fahe programa ba ita-boot sira hodi ita-boot sira hatuta ba maluk sira seluk, tanba saida mak ita tenke vota ba númeru 2," hatete nia.
Taur dehan, razaun prinsipal mak nasaun TL so sai forte bainhira Lú Olo sai Prezidente Repúblika.
“Tanba nia kuda ai, nia hatene rega, nia hatene tau-matan, ida númeru 1 nia fukit, nia silu, tanba ne'e labele,” dehan Taur.
Iha fatin hanesan, Alkatiri hatete, Lú Olo sente triste tanba nia kompañeiru luta, Xanana, trata at nia.
“Ema ida ne'ebé eleitu ona nia la presiza mai tan, tanba ne'e Lú Olo laiha ne'e, maibé nia iha ne'e, ne'e prova momoos kedas. Ohin dader ha'u ba ko'alia ho kandidatu Lú Olo, tanba nia laran susar tebes, tanba nia kompañeru uluk, nia superior uluk, Xanana dehan tolok nia rahun liu, ko'alia sasan devia nia nunka ko'alia ba nia kompañeru no ha'u hakalma tiha Prezidente Lú Olo, husik ha'u mak hasoru nia,” dehan Alaktiri.
