Tan ne’e, CNE haruka ona karta ida ba kandidatu Prezidente Repúblika númeru 1, José Ramos Horta, no kandidatu PR númeru 2, Francisco Guterres Lú Olo, hodi evita hato’o programa governu nian iha kampaña eleitoral kandidatu PR.
Prezidente CNE, Jose Agustinho Belo hatete, CNE hamutuk ho PNTL no PDHJ hakerek karta ba kandidatu PR sira atu konsentra de’it ba kompetensia PR nian iha kampaña eleitoral ronde daruak.
"Ha'u hanoin ita rejista nafatin, ho PNTL, PDHJ, ita hakerek karta ba kandidatu sira atu evita programa ida Governu nian, di'ak liu rai hela ba aban-bainrua, 2023, agora konsentra ba papel Prezidente (Repúblika)," dehan nia hafoin partisipa seminariu kona-ba eleisaun nian ne’ebé organiza husi estudante UNTL no UNDIL, iha Suai Room, Timor Plaza, Segunda (11/04).
Nia hatete, PR la’os ezekutivu atu koalia programa oioin, tan ne’e di’ak liu konsentra ba knar PR nian.
“Povu mós matenek no intelektual ona. Ha’u hanoin sansaun sosial sei iha no se sira fó nia votu ba ema ne'ebé koalia tuir programa ne'ebé di'ak no komportamentu ne'ebé di'ak, entaun aplika situasaun sira ne'e di'ak liu evita tanba la ajuda kandidatu sira bele kompete ho di'ak," dehan nia.
Aleinde ba asuntu refere, nia dehan, CNE mós hakerek ona karta ba kandidatu sira atu asegura Unidade Nasional hodi evita hasai lia-fuan ne'ebé la kontribui ba nasaun.
"Ami hakerek karta mós ba sira buat ida la kontribui ba ita-nia nasaun no halo ita par laiha, tanba prezidente atu asegura Unidade Nasional, ne’ebé lia-fuan sira ne'ebé la kontribui, sobu ita-nia nasaun nia unidade ha'u hanoin la merese par atu koalia, ha'u hanoin sansaun legal ita sei foti, lao tuir regras ne'ebé iha, maibé sansaun sosial ha'u hanoin povu sei kompriende liu situasaun ne'e,” deklara nia.
