Tuir observasaun online Independente www.independente.tl iha terrenu katak, iha kapital Dili eleitór sira balun hakbesik an ona ba sentru votasaun idaidak hodi tu’u ba ema na’in ida husi kandidatu presidente na’in 16.
Tuir dadus STAE fó sai katak, populasaun Dili hamutuk 328.666 ho eleitór ne’ebé rejistu 190.710.
Iha sentru votasaun Ensino Basiko Filial Fatuhada, Suku Fatuhada, ekipa tekniku STAE, CNE, no fiskais sira ho eleitór sira sai sasin hahú loke ona urna eleitoral (kaixa votasaun) ne’ebé ho kondisaun tomak (segel).
Hafoin loke urna, eleitór sira forma ona tuir liña atu ba foti bulletin votus hodi tu’u ba kadidatu presidente ida.
Ambiente hanesan mós iha sentru votasaun, Aldeia Bitaba,Suku Bairu-Pite, Postu Dom Aleixo, eleitór sira ho antusiasmu hahú vota ona, hahú iha tuku 7:00 dader.
Eleitor sira forma iha Sentru votasaun, Aldeia Bitaba,Suku Bairu-Pite, Postu Dom Aleixo. Foto: Saturnina da Costa
Komunidade iha Aldeia Bitaba, Suku Bairu Pite, Postu Administrativa Dom Aleixo, Munsipiu Dili, hahu ezerse sira nia direitu vota, iha sentru Votasaun.
Tuir observasaun iha terenu nota katak, urna hahu loke husi fiskais sira no mos akompana husi Comisaun Nasional Eleisaun (CNE) no Polisia Nasional Timor-Leste (PNTL).
Hafoin loke urna komunidade sira mos hahu forma dadaun atu ezerse sira nia direitu vota.
Iha sentru votasaun refere, dader ne'e mais ou menus komunidade besik rihun 2 mak hahu dadaun forma ona atu vota. Atividade vota ne'e la'o ho di'ak, hetan seguransa maximu husi PNTL.
Situasaun jerál iha sentru votasaun kapital Dili la’o ho ambiente seguru, hakmatek, ne’ebé hetan seguransa maximu husi parte seguransa PNTL.
“Durante ne’e ita rejistu ona populasaun iha Timor-Leste hamutuk 1.280,743. Husi total ne’e ita nia eleitór sira iha timor laran tomak hamutuk 859.613, númeru eleitor ne'e mai husi munisipiu 12 no RAEOA, postu-administrativu 65, suku 452, sentru votasaun 1.200 no estasaun votu 1.500,” dehan Diretór Jerál STAE, Acilino Manuel Branco iha edifisiu STAE, vera crus, sesta ohin (18/03).
Nia dehan, total eleitór timor-oan iha Australia hamutuk 1.487, Koreia do Sul 1.277, Irlanda do Norte 1.264, Portugal 856 no Reinu Unidu hamutuk 2.229.
Molok ne’e, Presidente Comisaun Nasional Eleisaun (CNE), Jose Belo informa ba eleitór sira iha Timor laran tomak no iha nasaun seluk atu, ohin iha tuku 7:00 dader hakbesik aan ba sentru votasaun hodi utiliza tempu ne'ebé osan mean ba Timor tomak nia futuru no nasaun nian.
"Husu ba populasaun tomak, no eleitór tomak, atu utiliza tempu ho di'ak, tempu ne'ebé mak osan mean ba Timor oan hotu, atu hakarak konstrui ba ita nia rai no kontribuisaun ba ita nia rai importante tebes, tanba ne'e labele fiar rumoris sira, eleisaun sei susesu to'o hotu", dehan nia.
Nia informa, karik mosu ameasa ruma kona-ba situasaun loron aban (ohin) nian, parte PNTL sei hola medida tuir lei eleitoral katak sei kondena pena prizaun tinan tolu (3).
"Tanba ne'e ha’u husu ba ita hotu, atu nafatin mantein posizaun hodi hatudu ita nia matoridade no responsabilidade iha loron votasaun ne'e, tanba ita hotu hakarak halo Timor sai nasaun ne'ebé morin iha rai li'ur no ita hotu hakarak atu disidi futuru nasaun ne'e nia ho susesu", tenik nia.
