Komandante Jerál PNTL, Komisariu Faustino da Costa hateten, membru polisia husi nasional hamutuk 200 hodi desloka ba munisipiu 12 no RAEOA hodi apoiu komandu Munisipiu PNTL iha eleisaun presidensial.
“Seremonia deslokasaun ne'e atu responde ba komandu Munisípiu sira, ne'ebé sira sempre hato'o katak ami nia rekursu la sufisiente para koloka ba iha sentru votasaun sira, tanba atu responde nesessidade proposta husi ita komandante Munisípiu sira hato'o mai atu apoiu tan, nune'e Kuartel jerál rasik inklui unidade tolu ita koloka hotu, nomeia no tau ba iha Munisípiu sira," dehan Faustino iha Komandu Jerál, Kaikoli,dili (17/03)
Iha tinan ida ne'e sentru votasaun aumenta númeru ne'ebé boot ba rihun ida atus rua, tanba ne’e membru polisia sira ne'e mós presija aumenta hodi halo seguransa ne'ebé maximu.
“Hahú ohin, membru sira ne'e submete direita ba komandante munisípiu ne'ebé sira koloka ba, no komadante Munisípiu mak sei jere hodi tau sira iha sentru votasaun no iha eskuadra sira, ne'e iha Munisípiu mak sei haree,” dehan nia.
Membru PNTL hirak ne'e nia misaun sei remata iha munisípiu bainhira tribunal rekursu fó sai ona rezultadu final kona-ba eleisaun presidensial.
“Sira nia misaun ne'e to’o bainhira rezultadu ne'e aprezenta ona ba CNE nasionál hodi kontinua ba apuramentu nasionál, maibé iha sentru votasaun sira, tantu sede, STAE, autóridade munisípiu, STAE no CNE nasionál, ita nia PNTL nafatin asegura, 24 oras to’o rezultadu tribunal rekursu fó sai,” afirma nia.
Tanba ne’e husu ba membru PNTL sira serbisu iha terenu nafatin servisu imparsial, la hare ba kór, rasa, etniku, relijaun no mós klase sosial ka ekonomia, rona no respeita hodi kumpri komandu nia orientasuan ho disiplina.
“Kada munisípiu iha koloka membru polisia sira depende ba nesessidade, munisípiu balun hetan apoiu mais 20, balun 5 no balun ate 40 ida ne’e mak ita halo husu atu hatudu disiplina imparsial durante segurasan iha eleisaun presidensial,” afirma nia.
Tanba ne'e efetivu komandu PNTL hamutuk rihun 4 sei funsiona hotu halo seguransa iha festa demokrasia ne’e.
