Kandidatu Prezidente Repúblika, José Manuel Ramos Horta hateten,  númeru 14 pelumenus ho vota ida aseguradu.

“Onra, orgollu no esperansa, ohin hau hanesan primeiru mai vota simboliku, hau kontente ke semana sira nia laran pre kampaña nee ita bele hateten violénsia laiha, iha insidente balun, maibé agora laós momentu atu koalia fila-fali,” dehan Horta, hafoin vota, iha sede suku Metiaut, sabadu, (19/03).

Nia fó parabens ba  kandidatu sira hotu no parabens ba partidu sira hotu liuliu povu no sosiedade  prosesu eleitoradu ida nee lao diak tebes, no  agradese ba komunidade internasional neebé ke apoiu.

Nunee mós observadór internasionais, Komunidade Paízes Lingua Portugues (CPLP) no Uniaun Europeia sira akompana Timor-Leste nia situasaun polítika, ekonomiku no sosiál no sira kontinua sai parseiru importante ba Timor-Leste.

“Ita hein rezultadu, ita komesa haree orsida kalan no aban rezultadu neebé mai, hau rasik hakruuk rezultadu nee, tanba nee desizaun povu nian,” nia informa.

Tuir observasaun Jornalista Online INDEPENDENTE  iha terenu asesu katak, José’Ramos Horta too iha fatin votasaun iha tuku 07:00 oras TL no mai ho nia kareta rasik. No uza kalsa metan, kamiza metan no mós sepatu metan. Aliened, akompaña husi seguransa pesoal sira.

Nunee, eleitores sira antusiasmu hodi ezerse sira nia votu, aliende ida nee mós sentru votasaun nee rasik hetan observa husi fiskais kandidatu Prezidente Republika sanolu resin neen (16) no observador internasinaol Uniaun Europeia.

Sentru votasaun nee lao no seguru tanba hetan seguransa masima husi Polisia Nasionál Timor-Leste (PNTL).