Nia dehan, deklarasaun votus mak iha debate, kampaña nia vota atu hametin estadu direitu demokrátiku hodi hala'o dezenvolvimentu ida ne'ebé sustentavel bele hadia povu nia moris di'ak.

Ligadu ho kontajen, nia fó fiar ekipa atu hala'o servisu ho di'ak atu nune'e halo apuramentu loloos ba rejultadu ne'ebé ohin loron ema hotu ba husik hela sira nia votus.

"Ha'u hatete ona katak ha'u fiar metin ba primeira ronde ida ne'e husik ba povu ninia votu mak sei konfirma," dehan Lú Olo hafoin remata votu iha Eskola SD Farol, Sábadu (19/03).

Nia mós apela ba militante ho simpazitante sira ne'e atu simu rejultadu saida de’it husi eleisaun neébé justu.

"Se mak kompetente ne'e prontu atu bele manán, prontu atu bele lakon, maibé ha'u dehan ha'u sei manán," haktuir nia.

Nudar Timor-oan, Lú Olo dehan se mak atu manan iha eleisaun neé rejultadu liuhusi prosesu demokrasia ida, timor-oan tenki simu tanba nia mak nudar presidente ba povu tomak nian.

"Tanba ne'e husu ba hotu-hotu hakmatek nafatin atu lori eleisaun ida ne'e la'o ho di'ak" haktuir nia.

Iha fatin hanesan, Sekretáriu Jerál Partidu FRETILIN, Marí Bim Amude Alkatiri hatete, nia mai vota atu kandidatu númeru sorteiu 6 Francisco Guterres Lú manán.

"Ha'u mai vota atu manán ne'ebé manán tiha ona," hatete nia.

Nia haktuir, kona-ba garante pas no estabilidade ne'e husu ba sira seluk, FRETILIN sempre garante pas no estabilidade.

"Laiha karik, kandidatu Lú Olo manán tiha ona, ha'u simu dala hira ona lakon, ema balun mak la hatene seidauk abitua simu lakon, maibé ida ne'e ami manán," hateten nia.

Entretantu, tuir observasaun online Independente iha terrenu nota katak, kandidatu Lú Olo too iha sentru votasaun’, eskola SD Faról akompa husi nia espoza Cidalia Mouzinho Lopes Guterres, ho Sekretáriu Jerál Partidu FRETILIN Marí Bim Amude Alkatiri, iha oras tuku 08:07.