Virgílio hatete, bainhira eleisaun remata no sura votu iha Munispiu Baukau kaixa numeru 12 mamuk, nia sei la moe. Nia so moe bainhira povu ne’e hili sala ema.

“Iha Venilale ha'u mós dehan, bainhira sura votus karik iha Baucau ha'u nia kaixa mamuk, ha'u sei la moe ida,  ha'u moe bainhira ikus mai ita hotu hili sala ema,  maibe ha'u fiar katak, ha'u nia luhu-kidun iha Baucau sei la mamuk, la'os tanba ha'u Baucau oan, maibe tanba imi fiar katak ha'u bele duni,” dehan Lamukan iha ninia kampaña iha Postu Administrativu Ossú, Munisipiu Vikeke, Domingu (06/03).

Lamukan hatete, eleisaun Prezidensial la'os atu buka sorte ka kasa tesouro (memburu harta karung), maibe aktu ne’ebé umaniza ema nu’udar animal politiku. Animal polítiku ne’ebé iha direitu no dever.

Eleisaun prezidensial ka parlamentar, nia dehan, la'os "manu-futu". La'os atu buka "manu-maten." Kultura politika buka "manu-maten" iha manu-futu mak kultura ida ne’ebé ita akompanha durante tinan 20 nia laran ne'e.

Nia afirma, durante tinan 20 nia laran ukun-na'in sira interpreta konstituisaun no lei hanesan ema siik manu-fulun.

“Ukun-na'in sira, infelizmente, ita nia lider proeminente sira, uza ukun/poder hanesan ema uza tara iha manu-futu. Sira buka koko-malu ida ne’ebé mak nia tara kro'at liu. Tanba ida-idak lakohi sai manu-maten, entaun loron-kalan, durante tinan 20 ne'e sira sibuk mak kadi tara de'it,” Afirma nia

Tanba ne’e kultura demokrasia la'os depende ba "tara nia kro'at" maibe depende ba se mak iha ibun-badaen (kapasidade komunikasaun). Ibun-badaen atu hasee, seti no halibur hotu-hotu.

“Ema ibun-badaen nunka uza liman atu sikut nia maun-alin, maibe atu hako'ak,

bainhira sai PR, ha'u sei hala'o papel ida ne'e. Prezidente ne’ebé haree nia povu nia moris, rona nia povu nia lian (haksolok ka halerik) no ko'alia lori povu nia naran,  ha'u fiar ha'u bele, bele tanba ha'u fiar mos tanba ha'u barani,”  hatutan nia.