Kandidatura Prezidenter Repúblika (PR), Eng. Mariano Assanami Sabino hatete, nudar jerasaun foun kandidata aan ba PR la’os atu mai kompete ho aman sira, maibé mai atu kompleta hodi fó kontinuidade ba obra ne’ebé sira husik hodi liberta povu husi kiak no mukit.

Nudar mós jerasaun ne’ebé tinan barak hamutuk ho maun sira lidera luta iha Indonezia hamutuk ho Lassama maibé ohin nia la iha ona, no sira sira seluk ne’ebé ohin loron sei iha hela, liu-liu ba maun sira hotu ne’ebé uluk hamutuk mos liberta rai ida ne’e.

“Ohin ha’u hambrik fila fali hodi fó kontinuidade ba sira nia hanoin no prinsipiu, ha’u la’os mai atu kompete ho aman sira ne’ebé hambrik iha kuartu sorin, maibé ha’u hambrik firme atu kumpri Maubesi I no Maubesi II, ha’u husu aman sira atu nafatin konsistensia hodi kumpri enkontru Maubesi I-II, kona-ba tranzisaun jerasionál,” dehan nia, iha kampaña da-haat, iha Kampu Ainaru.

Assanami informa, nia kandidatura ne’e atu fó orgullu no dignifika pasadu aman sira nia luta, maibé sira mós tenke fó ona esperasan ba jerasaun milenial sira ne’ebé mak tenke ba oin.

Tanba ne’e, bainhira sai Prezidente Repúblika sei kria atmosfera politika ida ne’ebé nakonu ho paz hodi hakotu ona konflitu entre lider ho lider, no joven ho joven hodi hari Timor foun ida, ba Timor oan tomak.