“Loloos ha’u ba CNRT no FRETILIN, maibé lae no ha’u tama partidu foun imi foun ha’u mós foun no ha’u primeira-vés iha ha’u nia vida tama ba partidu ida. Vota ba partidu sira iha, maibé tama ba partidu sira laiha”, dehan nia iha intervensaun bainhira halo kampaña iha munisípiu Manufahi, Sábadu (24/6).
Nia dehan, tama ba PLP hanesan bom bunuh diri, tanba ema foun mai hasoru ema sira ne’ebé halo polítika ona durante tinan haat-nulu to’o lima-nulu.
“Maibé ha’u sei la ta'uk. Koko mak haree, tanba dala ruma foun ne’e iis boot liu fali sira ne'ebé tuan. Maibé ha’u haree imi ha’u hanoin tempu mak ne’e duni ona (time is over and game is over)”, tenik Taur.
Nia hateten, festa demokrasia ne'ebé sei hala'o iha loron 22 Jullu hotu-hotu sei ba vota dala ruma hanoin katak vota ne’e la vale, se la vale uluk iha 30 Agostu 1999 la vota karik saida mak mosu iha Timor. Signifika votu ne’e importante tebes bele determina moris.
Tuir Xanana Buka Kargu
Eis-Jenerál FALINTIL-Forsa Defeza Timor Leste (F-FDTL), Taur Matan Ruak hatete, ministru sira ne'ebé tuir Maun Boot Xanana Gusmão tanba hakarak atu hetan kargu, maibé sira la hadomi Xanana.
“Ha’u Xanana nia vise durante tinan 17 iha ai-laran. Tanba ne’e, ha’u koñese nia liu imi sira ne’e no mós ministru sira la'o ho nia ne’e, sira ne'ebé tabele nia para atu hetan oportunidade de'it”, dehan eis-gerrilleiru ne’e, iha ninia intervensaun bainhira halo kampaña aberta iha munisípiu Manufahi.
Nia dehan, sira hirak ne’e la’ós atu ajuda nia no sira nia oin nia koñese hotu sira hirak ne’e sei la brani atu ko'alia hasoru Taur.
Nia konta, momentu nia mandatu Prezidente Repúblika nia ba halo diskursu iha Parlamentu Nasionál katak imi kria iha Timor orang nomor satu no nomor dua.
“Ha’u la'ós funu iha ai-laran tinan 24 para atu halo ida ne’e”, tenik gerrilleiru ne’e.
Xanana: CNRT La'ós Ha'u Nian Mesak
Prezidente Partidu Kongresu Nasionál Rekonstrusaun Timor-Leste (CNRT), Kay Rala Xanana Gusmão hateten, partidu ne’e la'ós ninian mesak, maibé ba povu tomak nian tanba vota ba CNRT.
“CNRT la'ós ha'u nia mesak, maibé CNRT ita hotu ne'ebé hamriik iha ne’e no sira ne'ebé la mai no ba timor tomak CNRT ita hotu nian”, dehan nia, liu husi intervensaun kampaña eleitorál, iha Gleno, Segunda, horisehik.
Xanana dehan, nia ko’alia liafuan ida ne’e hodi fó lembra ba povu tomak no joven hotu katak, sira ne'ebé uluk la'o ho nia (Xanana) no mós ba mundu tomak katak labele haluha CNRT uluk liberta tiha ona rai.
“Tanba ne’e maka ha'u husu ba imi atu agora hamutuk ho CNRT iha ohin loron hodi ba oin nafatin hodi dezenvolve ita nia rai,” nia informa.
Nia afirma, bainhira partidu CNRT kuandu manan iha eleisaun CNRT la hanoin atu kaer ukun, maibé atu dudu povu Timor-Leste ida ne’e nia hanoin naruk.
Tuir nia, kuandu militante no simpatizante vota ba CNRT, maibé la'ós vota ba nia (Xanana) no vota ba povu sira nia futuru.
“Imi vota ba CNRT la'ós vota ba ha'u mai be vota ba imi nia futuru,” tenik nia.
Entretantu lider antigu ne’e husu ba partidu sira seluk atu vota ba CNRT, nune’e hamutuk hodi dezenvolve rai ida ne’e ba futuru.
