Sekretáriu Jerál Partidu FRETILIN Mari Alkatiri dehan FRETILIN maka kaer ukun  hakarak muda polítika agrikultura iha Timor Leste.

Tanba nia dehan, TL rai ki’ik ne’ebé labele halo kompetisaun iha setór agrikultura ho nasaun seluk sira hanesan Tailándia, Xina,Vietname ne’ebé iha poténsia ba setór agrikultura nian.

“Ho saida maka ita halo, Ita atu kuda hare duni ita tenke halo estudu ida ba ita nia rai ne’e ho bee, para ke ita hakarak kuda hare ida  di'ak liu iha mundu”, Dehan nia iha kampaña ba daneen ho tipu diálogu hamutuk ho komunidade sira husi postu Hatulia, munisípiu Ermera, Segunda (26/06).

Polítika FRETILIN nian ba setór agrikultura iha TL maka hakarak atu oinsá maka povu sira produsaun batar no haree tenke garante nian kualidade atu bele fa'an ba rai li'ur ho naran susu rice.        

Foos susu rice, nia dehan la'ós rai hotu-hotu bele produs, maibé FRETILIN identifika ona fatin ne’ebé maka di'ak atu kuda hare ida ne’ebé ho kualidade maka rejiaun Oekusi.

Tanba nia dehan, Iha Rejiaun Oekusi hahú produs foos ida bolu dehan Arroz memorada ne’ebé ho kualidade di’ak ho folin foos  la hanesan baibain.

Nia dehan, programa FRETILIN nia hakarak kria polítiku turizmu rurál ho agrikultura bele liga ba malu atu aproveita paizajen furak TL nian.

Hadi'a Jestaun Merenda Eskolár

Sekretáriu Jerál  FRETILIN dehan , tenke haree no hadi'a  jestaun merenda eskolár atu osan labele kaer husi diretór sira, maibé tenke aloka xefe kujineiru sira bele tein hahan ho kualidade di'ak no garante saúde ba alunu sira.

“Primeiru maka tenke iha dapur, tenke iha refeitóriu ha'u ba haree eskola balun estudante sira han tuur iha aihun keit, ha'u dehan saida maka ne’e, balun ba kuru fali bee iha mota maka lori mai ne’e labele”,Dehan SekJen FRETILIN ne’e.

Polítika FRETILIN , nia dehan, tenke iha dapur, água korrente, refeisaun atu fasilita estudante sira labele tuur iha rai de'it maka han.

Nutrisaun, nia dehan, labele fó fali foos, formungu no koto ida dodok ba estudante sira atu han. Tanba governu halo programa dehan povu kuda governu sosa, governu sosa ba tau tiha armajem ne’ebá to’o dodok no kulabur  foin fahe ba estudante sira.

Aleinde ne’e, FRETILIN  sei  fó prioridade kualidade rekursu umanu iha Timor-Leste liu husi hadi'a kualidade edukasaun no fó formasaun ba profesór sira.

Tempu FRETILIN  Kaer Ukun

Vise prezidente partidu FRETIL Francisco Miranda Branco dehan katak tinan sanulu resin ona povu barak maka seidauk sente dezenvolvimentu hanesan bee moos no estrada tanba ne’e tempu to’o ona FRETILIN atu kaer ukun hodi responde ezijénsia populasaun kiak no mukit nia.

“Ita nia projetu boot liu ida ne’ebé maka tenke lori FRETILIN hodi fila ba kaer ukun hodi keta husik tempu ida ne’e ba ema seluk atu ukun fali”, Dehan nia  

Tanba ne’e, nia husu ba povu Kovalima tenke servisu makaas hatutan programa FRETILIN nian tama sai uma atu nune’e povu sira fó fiar tomak mai FRETILIN atu haree futuru rai no povu ne’e.

FRETILIN mai ho nia programa ho konseitu atu liberta duni povu husi kiak no mukit ho razaun ne’e tenke vota ba FRETILIN tanba FRETILIN de'it maka hadomi povu no rai ne’e no FRETILIN hakarak haburas povu no rai ida ne’e iha jerasaun oin mai.

Tuir observasaun iha terrenu nota katak, iha kampaña ne’e la'o hamatek tebes  tanba hetan seguransa másimu husi  polisia no iha kampaña laiha envolvimentu direta husi labarik sira tanba polisia sira halo kontrola maka’as iha área kampaña.

Kampaña ne’e mós hetan partisipasaun másimu tebes husi militante no simpatizante tomak ne’ebé maka dezloka husi postu Fatumea, fatululi, Tilomar, Fohorem, Maukatar, Suai Vila no Zumalai  no tuir kalkula saun kuaze militantes rihun 4 resin maka partisipa iha kampaña ne’e.

Tuir oráriu aban partidu FRETILIN sei kontinua nia programa kampaña ba eleisaun parlamentár iha postu Zumalai ho tipu kampaña diálogu ho komunidade.