Sekretáriu Jerál Partidu Demokrátiku (PD), António Conceição "Kalohan" hatete, PD hamriik atu labele haree de'it jerasaun tuan lori todan,maibé tenke hamutuk hodi fahe todan ne’ebé maun boot sira lori hela.
"Xanana Gusmão ita nia maun maibé PD hamriik atu hakama-an, todan ne’ebé maka maun sira lori dezde ukun-an, husi tempu rejistadora to’o mai ita ukun-an," hatete nia iha ninia kampaña ba dala 6, iha munisípiu-Manatutu (25/06).
PD hamriik hodi forsa rasik, konta ho povu nia apoiu liu husi Eleisaun Parlamentár (ElPar), iha loron 22 fulan -Jullu, la'ós hanesan sira seluk iha fatin-fatin kata katak so maun (Xanana) de'it mak bele ne’e hatudu sira la brani atu halo buat ida ba rai ne'e.
Nia afirma, dezde tinan 2001, bainhira partidu ne’e hamriik. Katak sidadaun ida-idak tenke hola responsabilidade ba nasaun tenke brani hamriik halo buat ruma ba nasaun RDTL.
PD Lakohi Insulta Malu
Prezidente Partidu Demokrátiku Mariano Assanami Sabino hatete, kampaña eleitorál momentu importante atu lider partidu polítiku sira uza hodi hato’o polítika no programa partidu nian tinan lima no halo edukasaun sívika ba povu atu bele komprende prosesu demokrasia.
“Partidu Demokrátiku lakohi atu trata no insulta lider partidu seluk, ita hakarak atu eduka sidadaun bele harii pás no estabilidade atu eleva dezenvolvimentu iha rai laran ne’e mak ita hakarak” dehan Assanami iha kampaña ba dahaat iha Kampu futeból-Munisípiu Manu-fahi.
Tanba, PD hanesan Partidu kontinuador husi obra ASDT, FRETILIN no CNRT husik hela atu kontinua liberta povu husi kiak no mukit.
Loke Eskola Profesór Iha Aileu
Atu produsaun profesór kualidade ,Partidu Demokrátiku kompromete sei loke eskola ba profesór iha Munisípiu Aileu.
“Ha’u Kalohan maka promete ba ita boot sira kuandu imi fá fiar ba PD atu ukun Ami kompromete ba ita boot sira ami sei loke eskola profesór iha Aileu” dehan Calohan iha nia kampaña ba dala neen iha Munisípiu Aileu.
Polítika loke eskola profesór iha Aileu tanba durante ne’e Ministériu edukasaun deskobre profesór 4000 resin ohin loron tama ona ba idade reforma .
Aleinde ne’e, Iha tempu Aliansa Maioria Parlamentár (AMP), nia dehan, Prezidente Partidu Demokrátiku (PD), Mariano Assanami Sabino assume pasta nu’udar Ministru Agrikultura no Peska (MAP), ho nia programa ida fahe tratór gratuita ba agrikultór sira atu uza fila rai hodi kuda produtu lokál. Maibé oras ne'e Partidu Polítiku (ParPol), balun Politiza dehan Assanami fahe tratór ba militante PD, ne'e la la'ós.
Tanba ne’e nia husu ba povu, atu labele ragu-ragu hili PD iha loron 22, vota ba númeru 13.
“Ita nia Munisípiu hamutuk 13, ita nia númeru ne’e númeru sorte tanba ita reprezenta duni 13 Munisípiu ida ne’e, tanba ne’e keta haluha iha loron 22 vota ba númeru 13”, dehan nia.
