Xefe Governu dehan, iha períodu eleisaun prezidensiál ne’ebé halao, aproveita okaziaun ne’e hodi fó parabéns ba sidadaun no kandidatu sira hotu ne’ebé partisipa ona, ho respeitu malu no toleránsia, iha festa demokrátika ne’e.

“Ha’u hakarak hato’o mós boa sorte ba kandidatu sira ne’ebé ho votu barak liu ne’ebé agora atu ba segunda volta eleisaun nian, hein katak kandidatu ne’ebé sei hetan konfiansa husi Povu timoroan bele kontinua servisu di’ak sira ne’ebé maka prezidente sira uluk nian halo ona,” dehan nia, iha Palasiu Prezidensial, Bairru-Pité, horisehik.

Xefe Governu mós dejeza katak, ida ne’ebé mak eleitu bele estabelese kolaborasaun institusionál di’ak ida ho Governu no órgaun sira Estadu nian hodi buka kreximentu ba moris di’ak sidadaun sira nian no kumpre objetivu nasionál sira ne’ebé boot ba dezenvolvimentu nasaun ne’ebé moderna, segura, saudavel no próspera liu.

Entretantu, rezultadu provizoriu apuramentu ba eleisaun Prezidensial 2022-2027 hatudu laiha Prezidente Repúblika ida mak konsege hetan 50%+1, ne’ebé sai nu’udar ‘kriteriu’ atu manan iha ronda dahuluk, tan ne’e iha posibilidade boot atu avansa ba ronde daruak.

Maski seidauk fó komentariu kona-ba posibilidade hakat ba ronde dartuak nian, maibé Komisaun Nasionál Eleisaun (CNE) deklara sempre prontu ba kualker situasaun.

“Iha CNE ami seidauk sura hotu no seidauk kompletu, seidauk fó komentariu, ha’u hanoin CNE sempre prontu, tanba segunda reoda fulan ida de’it, kampaña mós loron 15 nafatin, maibé prosesu la’o hela,” dehan Prezidente CNE, Jose Agostinho Bele.

Kona-ba rezultadu eleisaun, nia dehan, horisehik nu’udar loron ikus ba prosesu apuramentu nasionál no STAE sei enktrega ba CNE hodi halo verifikasaun ba votus nulu no votus reklamadu sira.

“Espera katak loron rua ka loron tolu nia laran rezultadu it abele fó sai ona,” dehan nia.