Diretór Jerál STAE, Acilino Manuel Branco hatete, durante loron tolu, hahú husi 19 to’o 21, tékniku sira halo apuramentu no rezultadu provizóriu, parte STAE hala’o tuir ninia faze sira.
“Prosesu sira tomak ne’e ita la’o tuir ninia faze. STAE responsábiliza mak to’o ona ninia rohan. Sei iha faze tuir mai ne'ebé maka sei iha oras 72, iha CNE,” dehan nia, iha edifisiu STAE, Kaikoli, horisehik.
Depois sei haree fila-fali reklamasaun sira, votu nulu, no mós votu braku ne'ebé tuir rezultadu provizóriu ne'ebé iha purvolta kuaze 2%.
Nia hatutan, iha prosesu sira tuir mai, STAE sei kontinua ezerse ninia funsaun hanesan baibain, hanesan servidór estadu ida, prosesu ida hotu ona maibé sira kontinua hala’o funsaun.
Nia informa, tuir prazu tempu, loron tolu ba CNE, hahú husi 22 to’o 24 Marsu 2022, sei konklui prosesu apuramentu, hodi hein mós material sira husi Australia, Koriea, Portugal, Inglaterra, no Reinu Unidu, sei to’o iha Timor-Leste, iha 27 Marsu hodi bele konklui ona ninia prosesu tomak no ikus mai entrega ba Tribunál Rekursu.
“See la sala 1 Abril 2022 hanesan ne’e rezultadu finál sai ona, hotu-hotu bele asesu ona, depois ita hodi haree ninia prosesu ba oin atu la’o halo nusa. Mas to’o agora hau labele adiante uluk buat ruma, kona-ba kontinuasaun husi prosesu ne’e ba oin halo nusa,” nia releta.
Nia dehan, husi totál ata sira ne’ebé nia prosesu kontajen remata, Kandidatu José Ramos Horta 301,481 (46.58), Francisco Guterres Lú-Olo,143.408 (22,16%), Armanda Berta dos Santos 56,289 (8,70 %), Lere Anan Timur 48,959 (7,57%), Mariano Assanami Sabino 47,008 (7,26%), Anacleto Ferreira 13,059 (%2,02), Martinho Gusmão 8.485 (1,31%), Hermes da Rosa Correia Barros 7,958 (1,23%), Milena Pires 5,335 (0,82%), Isabel Ferreira 4,165 (0,64%), Felisberto Araujo Duarte 2,615 (0,40%), Constâncio Pinto 2,474 (0,38%), Rogério Lobato 2,028 (0,31%), Virgílio Guterres 1,685 (0,26%), Antero Bendito 1,531 (0,24%) no Ângela Freitas 692 (0,11%).
