Tuir informasaun ne’ebé jornalista jornal INDEPENDENTE hetan husi ema ne’ebé besik kandidatu Lere ne’ebé lakohi públika nia identidade, Kandidatu Prezidente Repúblika númeru 8, Lere Anan Timur, horibainrua, 22 Marsu kalan, hasoru-malu ona ho Prezidente Partidu CNRT, Kay Rala Xanana Gusmão.
Ba fatin enkontru, fonte ne’e lakohi fó fatin detail maibé hatete de’it katak Lere ba hasoru-malu ho Xanana iha fatin balun iha Dili.
“Pai Lere ba hasoru nia Maun Boot (Xanana) horikalan (horibainrua kalan),” informa fonte ne’e via telefone, Kuarta (23/03).
Nia dehan, enkontru entre lider na’in rua ne’e nu’udar kontinuasaun ‘dada-lia’ badak entre Lere ho Xanana no Horta enkontru ne’ebé ekipa husi Lere no Xanana iha Larigutu, Vikeke, iha 3 Marsu liu ba.
Molok ne’e, tuir informasaun husi fonte iha partidu CNRT, bainhira akontese duni ronde daruak, CNRT sei halo aprosimasaun ba kandidatu PR sira ne’ebé la konsege avansa ba ronde daruak.
Kandidatu PR ne’ebé tama iha lista CNRT mak Lere Anan Timur no Mariano Assanami Sabino.
“Iha mós posibilidade atu hakbesik an ba kandidatu seluk tan hanesan Anacleto no Hermes,” dehan fonte ne’e.
Kona-ba posibilidade atu husu apoiu ba kandidatu PR husi partidu Khunto, Armanda Berta, fonte ne’e dehan Berta la tama iha sira-nia lista.
“Berta la tama. Ida ne’ebé klaru ona mak pai LAT ho maun Assanami,” dehan fonte ne’ebé lakohi públika nia identidade.
Maske nune’e, fonte ne’e hatutan, Horta ho partidu CNRT sei diskuti kona-ba vantajen no dezvantajen molok foti desizaun.
Horta Hasoru Assanami
Kandidatu Prezidente Repúblika númeru 14, José Ramos Horta, kontinua loke komunikasaun ho kandidatu PR sira seluk no ho partidu politikus ne’ebé fó apoiu ba kandidatu sira iha eleisaun prezidensial.
Iha Kuarta (23/03) maizumentu tuku 5 loraik, Kandidatu PR númeru 16, Mariano Assanami Sabino hakat ba rezidensia Horta iha Metiaut, Dili, hodi hasoru-malu.
Tuir informasaun husi fonte ida ba jornalista jornal INDEPENDENTE katak, Assanami hasoru Horta hodi halo komunikasaun, liu-liu ba posibilidade atu fó apoiu ba Horta iha ronde daruak.
“Loraik ne’e Assanami ba hasoru ona katuas Horta,” informa fonte ne’ebé lakohi públika ninia identidade.
Entretantu, tuir informasaun husi ekipa susesu Horta nian, kandidatu númeru 14 ne’e sei kontinua halo aprosimasaun no loke komunikasaun ba kandidatu PR hotu-hotu.
Tuir planu, ohin, 24 Marsu 2022, Horta sei hasoru-malu ho kandidatu PR sira seluk.
To’o horseik, kandidatu PR na’in haat no partidu politiku tolu mak hasoru ona Horta.
Kandidatu PR sira mak hanesan Martinho Gusmão, Anacleto Bento Ferreira no Hermes da Rosa. Enkuantu partidu politiku sira ne’ebé hasoru Horta mak Partidu Demokratiku, PDRT no PUDD.
