Diretór Jerál STAE, Acilino Manuel Branco hatete, parte STAE nia pozisaun sei kontinua halao tuir lei no prosedimentu ne'ebé mak iha ona katak sidadaun sira ne’ebé mak atu ba ezerse direitu votu iha sentru paralelu ne'e tenke rejista.
Maibé, bainhira CNE konklui ona prosesu tomak hodi lori ba Tribunál Rekursu atu foti desizaun karik tama duni iha ronde daruak, nia hatete, STAE sei la intende eleitór foun atu vota iha sentru paralelu.
“Ita sei kontinu aplika situasaun hanesan, karik ba segunda volta ne'e eleitor sira ne'ebé rejista tiha ona Primeira Volta ninian, ne'ebé ita sei la halo tan atendimentu lori rejista fali eleitores foun ne'ebè mak hakarak ba vota iha sentru paralelu,” dehan nia ba jornalista sira iha edifisiu Komisaun Nasionál Eleisaun, Tersa (22/03)
Ba sidadaun sira ne’ebé rejistu ona iha sentru paralelu, Acilino husu atu labele ba vota fali iha idaidak nia munisipiu.
“Dala ida tan, sei laiha rejistu foun ba iha votasaun paralelu nian, ha’u apela katak sei kolabora hamutuk atraves ho brigada sira atu informa ba lideransa komunitariu atu ita-nia sidadaun sira iha momentu ida ne’e kartaun eleitorál idaidak nia suku prepara ba karik segunda volta,” dehan nia.
Molok ne’e, iha eleisaun iha 19 Marsu, mosu dezintendimentu barak iha sentru votasaun paralelu iha STM Bekora, Jinaziu no INAP Komoro.
Iha sidadaun barak ne’ebé la konsege ezerse sira-nia direitu votus iha sentru votasaun paralelu tanba sira-nia naran la rejistu.
