Jurista Timoroan, Amu Júlio Crispin hateten, iha eleisaun mak kandidatu ida laliu metadu, tenke ba segundu ronde.
“Entre kandidatu ida ho kandidatu rua ne’e sei ba segunda volta, ida ne’e artigu 11 lei eleisaun Prezidensiál no artigu 76 konstituisaun, ne’e duni sira nain hirak ne’e hotu, nein ida liu metade,” dehan nia, iha Kampuz Universidade Nasional Timor Lorosa’e (UNTL) Parlamentu Nasionál Oin, kuarta (23/03).
Nia hateten, kandidatu ida liu metade signifika pursentu 50+1 katak maioria absoluta, maibe laiha ida maioria absoluta, ne’ebé lei haruka ba segundu volta no agora prepara fali eleisaun prezidesial nain iha 19 abril.
“Artigu 76 numeru 2 ko’alia kona-ba mais de metade, iha lei eleisaun prezidensial artigu 11 numeru 2 mós ko’alia katak mais de metade katak 50+1, tanba ita nia sistema eleitorál ne’e, aborda maioria absoluta, la’ós maioria simples, tanba mak tenke ba segundu ronde, kandidatu ida la hetan maioria absoluta, maibé maioria simples,” nia relata.
Nia informa, agora CNE halo verifikasaun apuramentu nasionál, depois tribunál rekursu sei deside hakat ba eleisaun tuir regras no prosedimentu ne’ebé mak iha.
“Tribunal Rekursu ne’e aplika lei deit, kuandu lei hateten hanesan ne’e tribunál mós tenke deside hanesan ne’e,” nia hateten.
Nia informa, agora kandidatu Primeiru no segundu manan eleisaun ne’e mak sei hakat ba eleisaun no povu mak sei deside liu husi sira nia votu.
“Maibé presiza negosiasaun kandidatu sira ne’ebé mak segundu volta ne’e programa no material kampana tenke halo didiak para povu bele fó votus, maibé sira nain rua iha votu vantazen ba segundu ronde, sira nain rua prezidente repúblika hotu ona,” hateten nia.
Nia relata, sira nain rua koko hotu ona, kna’ar Prezidente Repúblika nian oinsá no oinsá mak bele aplika konstituisaun no lei atu hala’o ninia kna’ar, sira hatene hotu ona, agora ne’e hein deit mak sira nain rua ba konvense vontante sira atu vota sira.
