“Ita-nia eleisaun primeiru la’os koalia kona-ba kuarezma de’it, maibé to’o mai atu termina ne’e iha loos tempu semana santa. Ne’e duni iha loron 16 to’o 17, Konferensia Episkopal, ami hanoin halo karta ida atu husu, liuliu pelumenus haruka ba iha na’i ulun sira ne’ebé responsavel see bele ita-nia kampaña ne’e halo to’o de’it iha loron kuarta,” tenik nia.
Nune’e, iha Kinta feira Santa, Sesta feira Santa no Sabadu Alleluia loron ida ke boot liu sarani Katolika iha mundu tomak, atu pelumenus povu hakmatek ba atu selebra nia Paskoa hafoin, Tersa tuir mai ne’e sidadaun ida-idak ba halo eleisaun.
“Maibé ne’e hotu planu ida Konferensia Episkopal ninian, maibé ami sei aprezenta karta hafoin depende ba iha responsavél sira atu tau iha konsiderasaun ka lae, maibé hakarak atu mós hasa’e povu nia lian iha tempu ne’e, tanba ita ne’ebé maioria Katolika,” nia dehan.
Nia akresenta, oinsá bele prepara ba Paskoa see iha kampaña ne’e dala-ruma lian sira xoke malu hela de’it, entaun hakmatek oitoan ba selebra Paskoa akompana hotu molok tama ba loron tolu ne’ebé bolu katak tridun paskal bele hakmatek molok tama ba Paskoa.
Karta ne’e sei direije ba Xefe Estadu, hafoin mak ninia naran sa ba hotu-hotu, governu liu-liu CNE, ne’e husu responsabilidade ne’e la’os dehan obriga tenke tuir, maibé lori Igreja no povu nian lian hato’o tuir lei hodi hein resposta husi ne’eba mai.
Joven Mantein Maturidade
Bainhira Tribunal anunsia eleisaun ronda daruak nian maka, Arsebispu Metropolitanu Dioseze Dili, apela ba joven sira atu kontinua hatudu maturidade hodi hatudu prosesu demokrasia ne’ebé la’o hamkmatek no pás ba mundu.
Nia dehan, dadaun ne’e hotu-hotu tuir kontaje votu ne’e tuir ho fuan no laran haree timoroan, liuliu joven dixiplina tebes, tanba ne’e kontinua mantein ida ne’e.
“Timoroan, liuliu joven ita kontinua hatudu ita-nia maturidade. Kontinua pontu ba iha mundu internasionál ne’ebé kontinua haree ba ita-nia reasaun hirak ne’e hotu fó nafatin valoriza,” dehan Don Virgilio, iha inaugurasaun Universidade Katolika Timorense, iha Balide, horisehik.
Nia hatutan, nasaun ki’ik no joven, maibé ho demokrasia ne’e sei foun loos ba Timor-Leste atu timoroan sira hakaas aan hatudu sai ezemplu ida ba mundu.
“Ita hakat ba segunda ronde, ha’u hanoin ida ne’e mós sei tan mós dezafiu ida ba ita hotu, maibé ha’u hanoin ita hotu aprende katak iha tempu hirak ne’e hotu ita buka atu pás,” dehan nia.
Nia hatutan, loos duni ida-idak iha ninia preferensia, maibé buat ida demokrasia tenke ejize hotu-hotu tenke respeita malu ejize mós tuir regra respeita ema nia liberdade, buat ne’ebé halo ona enkonraja povu tomak ikus mai bele sai valor hatudu ba mundu.
